Shillong, Nailar 25: U Myntri Rangbah ka Jylla Conrad Kongkal Sangma hynne ka sngi palei, ula kyntait ba kan don kano kano ka jyrsieh (scam) ha ka jingshem jong ka Enquiry Committee halor ka jingkynnoh pyndonkam bakla u Assistant Inspector General of Police (AIG) ia ki 29 tylli ki kali ka Tnad Pulit.
Haba iakren bad ki Nongthoh khubor, u Conrad ula ong ba ia kine ki kali la thied kat kum ki kyndon thied kali bala buh.
“Ngam iohi hangno hangno ruh ba ka kyntien ‘jyrsieh’ ka mih, ka long kum ka jingpyndonkam ia ki ktien jali jaum ban pynkylla ia ka jingthmu jong kaei kaei baroh. Kam treikam satia kumne. Ka dei ban long beit halor ka jingshisha” ula ong.
“Hooid, kala don ka jingbym biang ha ka rukom ai kali sha ki Pulit, ka lah ban don ka jingslem lane kano kano hynrei kane kam mut ba kiei kiei baroh ki dei ki kam jyrsieh. Namar kata, to ngin ap bad peit ia ka kaiphod jong ka jingtohkit kaba bniah hynrei ia ka kaiphod ba mynta hi ka ikop baka long kumta” ula ong.
Halor ka jingpynsajia ban sa shim pyrshah ia une u Heh Pulit lada shem ba u pyndonkam bakla ia ka bor, u Myntri Rangbah ula ong “Ngin sa tohkit ia baroh ki liang hynrei lada kam mih satia kata ka kam pyndonkam bakla ia ka bor…ngin sa peit kumno ba kan iaid”.
Ha ka kaiphod jong ka Fact Finding Team jong ka Tnad Pulit bala khlieh da u Inspector General of Police (Law and Order) MK Singh, la ong ba u AIG Bah GK Iangrai MPS, ula buh halade haduh 29 tylli ki kali shuwa u bnai Iaiong 2022 khlem da ioh ia kano kano ka hukum ne ka bor na ki bor ba dei khmih.
Napdeng kine ki kali, kawei ka dei ka Scorpio thymmai, kawei ka Bolero Thymmai, artylli ki Swift Desire thymmai, artylli ki Bajaj Motor Cycles ba thymmai ki dei ki ba khlem pat ai registration number namar ka jingbym pynbiang ia ki kot ki sla da u AIG. Nalor kane, bun nakine ki kali kim don satia ia ka BS VI Standard bad namar kata, kim shymlong satia kat kum ka jingbthah jong ka Ministry of Road Transport & Highway, kaba long ka jingpynkhein ain.
Nalor kane, haduh 8 tylli ki Bajaj Pulsar 150CC bala thied ha u snem 2019 ym shym la lah ban register namar ka jingbym don ia ki kot ki sla.
Kawei ka Hyundai Verna kaba set ha Central Workshop ka dei kaba la pyndait da u nombor thok bad ym pat shym la register satia ia kane ka kali da u AIG namar ka jingbym don ki kot ki sla kaba long ruh kumjuh ia bun tylli kiwei pat ki kali.
Ha kajuh ka por, ka Fact Finding Team kala ai jingmut ba donkam ban thung da ka Departmental Enquiry pyrshah ia ki Ophisar thohbria ban tynrong ia ka jingkitkhlieh ia ki jingleh bym dei baroh.
Kala ai jingmut ruh ban thaw ia ka High Level Fact-Finding Enquiry ban ngam jylliew ia kane ka kam jyrsieh naba kane ka kaiphod jingtohkit ba mynta ka lah ban nym pynpaw ia ka jingheh jong kane ka jyrsieh.
