Shillong, Lber 16: Ki pulit ka West Garo Hills ha ka sngi Nyngkong, ki la kyntait ia ka jingthoh kaba la saphriang paidbah ha ka Facebook, ba kynnoh ba ki Pulit ki la leh iaka kam khlem ka jingkitkhlieh ha ka por ba talasi ha Garo Hills, da kaba ong ba katei ka video ka long kaba ialam bakla bad kyntu ia ki paidbah ba kim dei ban shah ialam bakla.
“La pynshai ba ïa ka jingtalasi ha kawei ka ïing la pynlong katkum ki kyndon jong ka aiñ Bharatiya Nagarik Suraksha Sanhita, 2023 (BNSS). Ïa ka jingtalasi la ïalam da u heh pulit, hapoh ka jingring Video bad ha ka jingdon lang ki nong sakhi laitluid ha ka jingbud ryntih ïa baroh ki kyndon aiñ” ong u Superintendent of Police West Garo Hills u Abraham T Sangma.
“Ki bahaïing hasem ki la don bad ki la synran ïa ki Pulit haka por talasi” u la bynrap.
“Ia ka video la pynphriang da ka jingthmu ban ialam bakla ia ki paidbah bad ban pynphriang ia ki jingtip lamler pyrshah ia ka Tnad Pulit”, la ong u SP.
Kino kino kiba kwah ban tip kham bniah halor ka jing talasi ki lah ban leit sha ki pulit jong ka District daka rukom kaba dei ban peit iaka Video por talasi.
“Ki pulit ka West Garo Hills District ki dang ïai bteng ban pynneh ïa ka jinglong khuid bad ban pynneh ïa ka synshar aiñ haba ki pyndep ïa ki kamram jong ki,” la bynrap u SP.
