Shillong, Naitung 21 : Haduh 323 ngut ki nongthep vote ha Meghalaya kila kyntait ban pdiang ia ki Enumeration Form (EF) ha ka jingleh Special Intensive Revision (SIR) 2026, iathuh u Chief Electoral Officer Dr BDR Tiwari ha ka sngi Ba-ar.
Haba iasam jingtip halor ki kam ki ASDD, u CEO u iathuh ba 53,908 ngut ki nongthep vote, ba kot 2.29% na ka jingdon ki nongthep vote ha Jylla, ki dei kiba la ithuh kum ki Absentee (ki bym don ha Iing), kiba la kynriah jaka sah, kiba iap bad ki dulicate haduh mynta.
“Na kine, 5,795 la ithuh kum ki bym don ha Iing, 13,379 kiba la kynriah jaka sah, 32,382 kiba la iap, 2,029 ki duplicate, katba 323 ngut kila kyntait ban pdiang ia ki Enumeration Form” iathuh u Tiwari.
U ong ba ia kine ki case baroh, kynthup kito kiba kyntait ia ki form, yn sa leh eiei kat kum ka Registration of Electors Rules, 1960, hadien ba dei pynshisha bad ban ailad ia ki kat kaba lah, hashuwa ban shim ia kano kano ka rai halor ka electoral roll.
U CEO u iathuh ba ka SIR kala kynjoh ia 98.17% ka jingsam ia ki EF kat haduh ka 21 tarik Naitung, 2026, ha kaba haduh 23,06,585 tylli ki form lah dep ban sam sha ki 23,49,645 ngut ki nongthep vote.
Ka jingpynrung ha ka kor digital kala kot 62.15% kaba long haduh 14,07,446 tylli ki form.
Ka West Jaintia Hills, South West Khasi Hills bad South West Garo Hills kila kynjoh haduh 100% ka jingsam ia ki form katba ka West Khasi Hills kala lam khmat ha ka jingpynrung kor digital kaba kot 79.86%.
U Dr Tiwari ula pynkynmaw ia ki nongthep vote ki bym shym la aiti ia ki enumeration form bala dep pyndap hapoh ka por bala buh, yn ym kynthuh ia ki hapoh ka Draft Electoral Roll ka ban sa pynmih ha ka 5 tarik Nailar 2026.
Ia ki form lah ban aiti ha ki BLO lane online lyngba ka ECINET App and https://voters.eci.gov.in.
U CEO ula iakynduh ruh ia ki nongmihkhmat jong ki National bad State Political Party ha ka 21 tarik Naitung bad ai khublei ia u halor ka jingthung ia ki 892 ngut ki Booth Level Agents (BLA) ban iarap lem ha kane ka jingleh SIR.
