Guwahati, Iaiong 13: Ka sorkar Assam ka la kyntait ia ka jingkynnoh ha kaba iadei bad ka jingai jingkhein halor ka jingdon jong ki rhino hapoh Kaziranga National park katkum ka census 2022 ia kaba la pynpaw bad kynthoh da u nongtrei uba khmih halor ka jingpynneh pynsah ia ki mrad khlaw, u Rohit Choudhury lyngba ka RTI.
Ka sorkar Assam ka la kyntait ia katei ka jingkynnoh haba jubab halor ka kaiphot ba la pan jingpynshai da ka tnat ministry of environment forest and climate change ka sorkar pdeng.
Na ka liang u Choudhury u la thohsha ka tnat forest and environment ministry ha ka 27 tarik u Kyllalyngkot ba la dep ha kaba u la kynnoh ba ka census jong u snem 2022 kaba pyni halor ka jingdon jong ki rhino hapoh katei ka park ka long ka bym shisha. Katkum u Choudhury la ong ba ka jingdon jong ki rhino ka long sa 200 shuh shuh bad ia kaba la ioh jingkhein ha ka snem 2018 kaba long 2,413 tylli.
Kane ka jingleh ia ka census kaba 14 ka dei kaba la shimti a ka KNPTR ha u bnai Lber jong ka snem ba la dep, kaba pyni ba ki don 2,634 tylli ki rhino shireng hapoh kane ka park.
Ia ka jingai jingkhein kaba khatduh la pynlong ha ka 28 tarik u Lber ba la dep ha kaba la pynpaw ba ki don 2,613 tylli ki rhino hapoh kane ka national park.
Na ka liang u principal chief conservator of forests (PCCF) ka Assam uba dei ruh u khliehduh jong ka kynhun forest force (HOFF), u MK Yadava u la thoh sha ka tnat forest and environment ministry ka sorkar pdeng na ka bynta ban shim ka jingpynshitom pyrshah ia utei u nongwad RTI u Rohit Choudhury halor kane ka jingialam bakla.
