Shillong Naitung 31: Ka Meghalaya Grassroots Music Project (MGMP) ha ka sngi Balang kala kyntait war ia ki jingkynnoh ba don ka jingleh shiliang bad jied briew ba ithuh ithaw ha ka jingjied ia ki nongrwai.
Ha ka kyrwoh khubor, u Coordinator jong ka MGMP Season 2, Bah Andreas War ula ong ba ka MGMP Season 2 kala don shibun ki rynsan iarwai bad iaput iatem manla u snem kaba long hapdeng 170 haduh 200 tylli ha kylleng ka Khasi Hills, Jaiñtia Hills bad Ri Bhoi.
Kane ka kynthup ia ka jingpyniaid hapdeng 350 haduh 500 ngut ki nongtem nongput man la u bnai, ka kam kaba khia ha kaban pynbiang ia jingdonkam baroh.
Ki nongkynthoh kila kynnoh ba kine ki jingeh ki pyni ia ka jingsniew ha ka rukom long rukom man ha ka jingtbit ka rukom pyniaid ia katei ka projek.
U Bah War ula ong, ki jingkynnoh ba ka don ka jingleh shiliang khmat bad ka jinglong shiliang khmat ha ka jingjied ïa ki nongrwai kila mih, ha kaba ki jingkynnoh ki pynpaw ba ki jingsngewtynnad shimet ki ktah ïa kino ki nongrwai kiba ïoh ïa ki lad ban pyni ia ka sap ka jong ki.
“Da ka jingbun ki nongiashimbynta, ka MGMP ka iengskhem ba ka jingshah liang ka long kaba ym lah ban leh. Ia ka rukom jied la shna khnang ba kan long kaba hok bad kaba kynthup lang, da kaba thmu ban kyrshan katba lah ia ki nongrwai na ka thaiñ bad da kaba bud ia ki kyndon. Ka jingthmu jong ka projek ka long ban kyntiew ia ka sap ha ka thaiñ bad ia ka kam jngohkai. Watla ki don ki jingkynnoh ba ka don ka jingleh shilliang khmat na ki trai jongki Café ia ki kynhun kiba kila jied, ka MGMP ka pynskhem ba la pynneh ïa ka thup ba ïahap ban pynthikna ïa ki lad ki lynti kiba ïaryngkat ia baroh,” ula ong.
Halor ka bynta bad ka jingpyniaid jong ka MGMP, u Bah Andreas War ula ong, ba kala don ruh ka jingkynnoh shaphang ka jinglong bym tbit jong ka kynhun jong ka MGMP, da ki jingai jingmut ba ki dkhot jong ka kynhun, kiba dei hi ki nongrwai ba pawnam, ki lah ban ioh ia ki jingrwai ki bym iahap.
“Ka MGMP ka pyrshah ia kine ki jingkynnoh bad kala batai ba ka jingdonkti jong ki kynhun ka long kaba kongsan bha na ka bynta ban pyniaid ia ki jingpynsangeh ha ka minit kaba khatduh ia ka prokram bad ban pynthikna ia ka jingpyntreikam kaba paka iaka prokram. Ia kiba bun ki dkhot jong ka kynhun, la ithuh kum ki nongtem kiba tbit bha kiba la noh synniang sha ka jingtreikam jong ka projek. Ki kamram ki jongki ki long kiba kongsan bha na ka bynta ka jingpynneh ia ka jingiadei kaba bha bad kiwei kiwei ki nongtem bad nongrwai, da kaba kyrshan ia ka jingjop jong ka projek.”
Shuh shuh, u War ula ong ba ka jingïakren kaba kongsan ka long ka rukom siew ïa ki nongrwai.
“Ka MGMP ka siew ia ki nongrwai nongtem katkum ki jingkhein ba la buh lypa da ka Meghalayan Age Limited bad ka tnad ba dei peit. Ka jingsiew kaba heh tam na ka bynta ki prokram ha ki café ka long ₹12,000, na ka bynta ki ‘Busking’ ₹10,000, bad na ka bynta ki jingialang kiba kyrpang ₹50,000. Ka jingsiew kaba palat ïa ka kynhun ka long ₹50,000 haba ianujor bad ka jingoh dor jong ki kynhun tem ne put kaba long palat ia ka ₹50,000. ” ong u Bah War.
“Ka Meghalaya Grassroots Music Project ka ieng hapdeng jong ka eriong jong ki jingkynnoh kaba ïadei bad ka jingpynïaid, ka jingjied ïa ki nongrwai bad ki rukom treikam ha ka liang ka pisa ka tyngka.
