Kyntait ka KHADC ia ka jingtyrwa ka Sorkar ban shimti ia ka jingsiew tulop sha ki Nongtrei ka Council

Shillong Nailur 30: U CEM bathymmai ka KHADC Bah Winston Tony Lyngdoh ula kren shai ba ka Voice of the People’s Party (VPP) bad ka KHADC ka kyntait ban pdiang ia ka jingtyrwa jong ka sorkar jylla ba kan iarap pynsiew ia ka tulop jong ki nongtrei jong ki Autonomous District Council (ADC).

Haba iakren bad ki lad pathai khubor hynne ka sngi Baar, u Bah Winston Tony Lyngdoh ula ong ba hadien ka jingialang bad ka Sub Committee ka sorkar jylla, ka Council kla dep ban ai ia ka rai kaba pura halor katei ka mat bad kala pynpaw ba ka pyrshah ia katei ka jingtyrwa.

“Ka Executive Committee bad ka VPP kala dep ban pynpaw shai kdar ba ka pyrshah jur ia katei ka jingtyrwa. Watla ngi lah dep ban iakynduh bad ka sub committee jong ka sorkar jylla bad shen ngin sa iakynduh biang ban pynskhem ia ka rai kaba ngi la shim , ngi iengskhem ha ka nongrim ba ngin ym pdiang ia ka jingtyrwa ka sorkar lada ka long ha kano kano ka rukom ruh” ula ong.

U Bah Lyngdoh ula kyntu kylla ia ka sorkar jylla ba kan pyllait noh ia ka bhah khajna jong ka Council ban pynthikna ba ka jingtreikam kan long kaba ryntih nalor kane ban ai ia ka jingiarap kaba shisien ne ka One Time Grant-in-Aid ban pynkhlain ia ka jingdon pisa tyngka jong ka Council.

“Nga kyntu ia ka sorkar jylla ba kan pyllait ia ka bhah khajna jong ka Council ha ka por kaba biang ban pynthikna ba ka rukom treikam kan long kaba iaid beit iaid ryntih. Ngi don ia ka jingthmu ban iakynduh ia ka tnad DCA ban lah thaw ia ki lad ki lynti ha kaban pynkhlain ia ka jingpynmih khajna jong ka council” ula ong haba bynrap “Lada ka sorkar ka don shisha ia ka jingsngewkhia ban kyrshan ia ki district council, nga kyrpad ba ka dei ban pyllait noh mardor ia ka bhah khajna ka jong ngi. Kumba ka long mynta ka jinglong jingman ka KHADC ha kaba iadei bad ka pisa pilain ka long kaba biang”.

Halor ka jingiadei hapdeng ka sorkar jylla bad ka KHADC kaba ialam da ka VPP, u CEM ka KHADC ula ong ba ka long kaba biang namar ba kam long kaba bha ne kaba sniew.

“Baroh ar tylli ki kynhun ki pyrshang ban iatreilang ha kaba iadei bad ki mat kiba kongsan, kaba pyni ia ka dak ka shin jong ka jingkloi ban iatreilang. Hynrei ka Council kala kyrpad ban pyllait ha ka por kaba biang ia ka bhah khajna ban pyntikna ba kan ym don kano ka jingthud ha ka rukom treikam. Ka council mynta ka dang ap ia ka sorkar jylla ba kan pyllait ia ka pisa kaba bun sha ka council khamtam haba kala dep ban pynpaw ne pynsngew ia ki jingsngew ki jongka sha ka sub-committee,” ula ong.

Ula iathuh ba ha kine ki 6 bnai kiba la dep, ka EC kaba la ialam da ka seng VPP kala lah ban tehlakam ia ki jingpynlut phut ia ka pisa ka tyngka.

Ha kaba iadei bad ka mat jong u Uranium, u Bah Winston Lyngdoh ula banjur ba ka nongrim jong ka Council ka long beit kumjuh kata ban pyrshah jur ban tih ia u uranium uba don ha ka thain.

“Ka jingiakren sani halor kane ka mat, kan sa urlong shisien ba ka Executive Committee kaba thymmai kala treikam pura” ula pynthikna.