Shillong, Nohprah 02 : Ka Sorkar Meghalaya Democratic Alliance (MDA) kala kynshew pisa haduh T. 4000 klur ban pyntrei ia I 240 tylli ki project da ka jingthmu ban nang pynbun ia ki jingtei jong ki kam jngohkai bad kyntiew ia ka ioh ka kot lyngba ki rukom jngohkai kiba iai neh.
Ia kane la pyntip da u Myntri Rangbah ka Jylla Conrad K Sangma haba ai jingkren ha ka sngi kut jong ka jingrakhe jubili rupa jong ka jingpyniaid ia ka Elephant Falls da ka San Shnong Youth Welfare Organisation (SSYWO) ha ka sngi Ba-ar.
U Conrad ula ban jur ia ka jingaiti bad jingpynleit jingmut jong ka Sorkar ha ki kam jngohkai kaba dei kawei na ki kam ba plie shibun ki lad, ki kam ba iai neh bad ba wanrah jingkylla nalor ka kam kaba lah ban pynurlong ia ka thong ban kyntiew ia ka ioh ka kot ba $Billion.
“Nga sngewtynnad ban pyntip sha phi ba ha kine ki hynniew snem shiteng, ngi la nang jam sha ka lynti jong ki jingkylla bad haduh mynta, ki don kumba 240 tylli ki project bala kynshew pisa haduh T.3900 klur ha kane ka kam” ula ong haba batai ia ki katto katne ki project ban sahnam ki ban sa mih bad ki ban sa pynkylla dur ia ka kam jngohkai ha ka Jylla.
Haba ai khublei ia ka SSYWO halor ka jingkynjoh ia u mawmer ba 25 snem, ula ong ba u ihun shisha ban iohi ia ka jing jop jong ka imlang sahlang ban iamih lang na ka bynta kawei ka thong. ‘Watla ka jingiaid lynti ka SSYWO ka long kaba eh hynrei ka jingrakhe mynta ka sngi ka long ka nuksa ban pyni ba kumno ngi lah ban kynjoh ia kiei kiei haba ngi iawanlang kum ka kynhun bad pynleit jingmut ia ka thong ba ngi don” ula ong.
Ula bynrap ba tang ka kyrteng San Shnong ruh ka dei ka dak ka jingiatylli haba bynrap “San Shnong ka mut san tylli ki shnong kum ki san tylli ki shympriah jong ka kti hynrei haba ki san shympriah ki iasohlang ka kylla long ka kti kaba ieng ia ka bor bad ka jingiatylli”.
Haba jubab ia ka jingsngewkhia jong ka SSYWO ban don ia ki don ki jaka leit bar ba paka ha Elephant Falls, ula ong ba ka jingdon ia ki jaka leit bar kiba khuid ha ki jaka wankai ki nongjngohkai pyrthei ka dei kawei na ki mat ba hakhmat eh jong ka Tnad Jngohkai bad pyntip ba ka jingthmu ban shna ia ka jaka leitbar ha Elephant Falls lyngba ka Corporate Social Responsibility kala iaid shakhmat.
Ha kane ka sngi, u Myntri Rangbah ula pynkup burom ruh ia ki nongseng jong ka SSYWO.
 kala kynshew pisa haduh T. 4000 klur ban pyntrei ia I 240 tylli ki project da ka jingthmu ban nang pynbun ia ki jingtei jong ki kam jngohkai bad kyntiew ia ka ioh ka kot lyngba ki rukom jngohkai kiba iai neh.){kind=link}