Dimapur, Risaw 15 : Halor ka jingkynnoh kaba iadei ba ka jingshah tohkit ba dang shen jong u Myntri Rangbah (CM) ka Nagaland u Neiphiu Rio ha ka ED hapoh ka jaka shong shipai ha Ranagpahar, na ka liang ka Rising People’s Party (RPP) hynnin ka sngi Thohdieng kala ong ba mynta u Rio ula kylla long u mraw jong ka BJP ba kane kan wanrah ka jingeh kaba khraw ia ka jylla.
Katkum ka lad pathai khubor, u CM ula shah buh jingkylli ha ka ED ha kaba iadei bad ka jingkynnoh sei ia ka pisa kaba T. 70 klur ha ka kyrteng jong ka high court building ka bym shym la don ha Kohima.
Watla katta na ka liang ka party synshar Nationalist Democratic Progressive Party (NDPP) kala kyntait ia kane ka jingmih khubor da kaba ong ba kam shym la don satia kano kano ka jingkhot hajir da ka ED pyrshah ia u CM ka jylla lane ha kaba iadei bad ka jingshah buh jingkylli ha kane ka tnat.
“Wat hadien ka jingtied miej jong ka NDPP bad ka jingiakhih ka jong ki ba ka jingtohkit jong ka ED pyrshah ia u CM ka dei ka khubor thok, hynrei kan ym don ka tdem khlem ka ding,” ong ka RPP lyngba ka jingthoh.
Ka RPP kala ong ruh ba kala ioh jingtip ba ka ED kala beh thong ruh pyrshah ia ki 10 ngut ki seating MLA ka NDPP.Kala ong ba kila don ruh ki khubor kiba pynpaw ba ka ED kala pynngat case kam bam sap pyrshah ia kine ki 10 ngut ki MLA.
Katkum ki tyllong khubor ka RPP kala ong ba kine ki 10 ngut ki MLA ki lah ban shu pynlong da ka jingiakren kaban poi sha ka jingiamynjur bad ka BJP, kata ban shu rung noh sha ka party BJP.
“Kumjuh ruh namar kane ka jingshah banbor halor kane ka case da ka ED, na ka liang u CM ka jylla ruh u lah ban pyniasoh ia lade bad ka BJP,” ong shuh shuh ka RPP. Nalor kata katei ka party kala ong ruh ba u Rio um lah lait satia na kane ka shrip ba la pynap da ka tnat ka sorkar pdeng.
Nalor kata ka TPP kala ong ruh ba ka NDPP ka don hapdeng ka khep kaba kam lah shuh ban leh ei ei ha kaba iadei bad katei ka bynta.
Haba pynshong nongrim halor ki jingmih khubor ba ka tnat shipai kala kyntait ban pynpaw ei ei halor kane ka bynta, ka RPP kala ong ba ka ED ha kaba nyngkong kala tohkit ia san ngut ki briew kiba iajan tam bad u CM, ha kaba uwei na ki u dei u nongiarap ba shimet mynta la bun bun bnai hapoh ka Case No. ECIR/GWZO/09/2020/488.
“Kumta ruh kalong kaba shisha ba u CM hi da lade un ngat ha ka jingshah tohkit,” ong ka RPP, kaba la bynrap ba kam long kaba phylla ia ka ED ba kan pynlong ia ka jingtohkit kaba neh hynriew kynta pyrshah ia u CM. “Kane ka jingtohkit kam dei kaba khatduh, bad ngi khmih lynti ba kane kan dang iai bteng ha kine ki sngi ki ban dang wan,” ong ka RPP.
Watla katta ka RPP kala ong ba kan khmih lada kane ka jingtohkit jong ka ED ha kaba iadei bad katei ka phang kan poi ne em shaduh kaba kut.
