Nongstoin, Rymphang 02 : Ka Hynniewtrep Youth Council (HYC)-Mawshynrut Circle kala kynnoh ba ka don ka jing pyndonkam bakla ia ka skhim FOCUS jong ka Sorkar MDA ha ka thain Mawshynrut namar ka jingiaid lait ia ki kyndon bala buh ha kane ka skhim.
Ka HYC-Mawshynrut hapoh ka jingialam u President samla Losbingnel Lyngkhoi, kala ong ba kane ka long kat kum ka jingshem jong ka seng lyngba ka Right to Information (RTI) bala pan halor ka jingsam ia ka skhim FOCUS kaba dei da ka song pisa sha ki paid Nongrep ka thain.
Ula ong ba kat kum ki kyndon, ki briew ba dei hok ban ioh ia kane ka skhim ki dei tang ki Nongrep kiba hap ban thaw ia ki producer group.
Ula ong ba haduh mynta haduh 111 tylli ki Shnong kila ioh jingiarap na kane ka skhim bad kiba la ioh jingiarap ki long tang marwei shiiing.
“Haduh T. 1,45,40,000 ka pisa la dep ban sam sha ki nongrep bad ia kane ka pisa la pynthep ha ki account jong ki producer group-kaba la mang T. 5000 uwei u nongrep” ula ong haba sot ia ka jubab RTI.
Hynrei ula kynnoh pat ba ka jingsam ia ka skhim ka long kaba bakla namar ki don ki longiing kiba la ioh 2 ngut na kajuh ka Iing bad don ruh wat ki nonghikai skul bad ki nongtrei contract kiba ioh ia ka pisa na ka skhim FOCUS.
Ula ong ba ka HYC-Mawshynrut kan dang iai buddien halor kane ka kam haba maham ba lada ka seng ka dang lap biang ia ka jinglehbakla, ka seng kan sa leh ia kaba donkam.
“Ngi titp shai ba kane ka skhim kam dei ka MLA ne MDC skhim hynrei ka dei ka skhim ki paidbah bala ai da ka Sorkar” ula ong.
