Shillong, Naitung 11 : Ka seng Hynniewtrep National Liberation Council (HNLC) ha ka sngi Palei kala kynnoh ba u Chief Executive Member (CEM) ka Khasi Hills Autonomous District Council (KHADC) Bah Pyniaid Singh Syiem, ula shu byrngem ban thad ia ki kam u Syiem ka Hima Sohra (blackmailed) da kaba khyllie biang ia ka notification ban pynduh ai jingithuh ia ka Majai kum ka “Raid”.
Ha ka kyrwoh, u General Secretary-cum Publicity Secretary ka HNLC Bah Sainkupar Nongtraw ula ong “Ka jingkhylie biang ia ka notification ban pynduh jingiathuh ia ka Majai kumka “Raid” ka dei ka dak kaba shai ba u Syiem ka Sohra ula shah byrngem eiei ha u CEM”.
“Ka jingdawa jong u CEM ban aiti lut ia baroh ki dulir/pata jong ki bar jylla ha Majai ka paw eh kum ka kam sain pyrthei ba long kamkai. Ha ka jaka ban pynleit jingmut tang ia ka Majai, kan bha palat lada pan ruh ia ki dulir/pata jong ki bar jylla ha Ichamati” ula ong.
U Bah Sainkupar ula ong ba u CEM u dei ban bthah ia kiwei ruh ki Hima bad ki Syiem ba kin aiti ia ki dulir/pata jong ki bar jylla kiba sah ha ki jaka ki riewlum, bad lada donkam, lada nud ban kyndang syndon ia ki. Da kaba leh kumne, nginsa shem ia ka jingshisha halor ka jingaiti jong phi sha ka Jaidbynriew”.
“To ngin iapyni sha ki paidbah ka Meghalaya ba ki District Council ka dei kaba mihkhmat ia ka Sorkar jong ka ain, ym ka Sorkar jong ki briew. Ka jingbym lah jong ki District Council, bad kumjuh ruh ka Sorkar Jylla, ban pynbeit ia ka kam Them Metor, kala shu ieh pynsahteng sah haduh mynta” ula ong.
U Bah Sainkupar ula ong ruh ba ka jingkylli ka mih ba hato ka jingpyndam biang ia ka Majai kum ka Raid kan don jingktah ne em ia ki nongshongshnong bar jylla. “Hato kin hap ban mih noh na Majai?. Kaba thamula balei ba ki bar jylla ki jied ban lehkmen bad thang bom bula bad pataka halor ka jingpynbna ka District Council ban pynim ia kane ka notification? (ba pynbna kum ka Raid)”.
U Bah Sainkupar ula kynnoh ruh ba dei haba u Syiem ula kyntait ban ai ia ka bhah kaba bun sha u CEM, ula pynmih ishu ia kane ka kam khnang ban ioh blackmail ia u Syiem ka Sohra.
“U Bah Pyniaid ula pyndonkam iala u manager bad katto katne ki nonglum pisa ban pyndonkam bakla iala ka bor kum u CEM. Ula lum pisa dalade na ki tyllong bapher bapher. I tharai u Bah Pynshngain Syiem, DyCEM, u tip ia kane katba kiwei ki dkhot ka Executive Committee (EC) ki lah ban nym tip” kynnoh u bah Sainkupar.
“Mynta, ka Majai ka long kum ka jaka pdeng ki kam khaii ha East Khasi Hills bad ka dei ka skum ia kiba bun ki riewsain pyrthei ba don jingmut bymman ba kin shim kabu” ula bynrap.
U Bah Sainkular ula ong ba u CEM ula buh jingkylli ba mano ba kham ieid ia ka Jaidbynriew, ma u ne mano, kala pynmih ia ka mat iatai kaba sngewtynnad.
“U Bah Pyniaid u dang dei u briew ba dang wan thymmai ne ba wan dier por (Johnny-come-lately) uba la mih na ka syrngiew jong ka karkhana dieng u Kpa, u bym don jingtip eiei shaphang ka kam sain pyrthei” ula ong.
Haba pynpaw ba ka HNLC kala iakhun ban pynioh laitluid ia ki paidbah bad ka nongiada ia ka Bri u Hynniewtrep da ki phew snem, u Bah Sainkupar ula ong “Phi long thik kum u Captain William A Sangma bad Indira Gandhi, kiba shu lap ia ka Meghalaya hynnin ka sngi”.
 ha ka sngi Palei kala kynnoh ba u Chief Executive Member (CEM) ka Khasi Hills Autonomous District Council (KHADC) Bah Pyniaid Singh Syiem, ula shu byrngem ban thad ia ki kam u Syiem ka Hima Sohra (blackmailed) da kaba khyllie biang ia ka notification ban pynduh ai jingithuh ia ka Majai kum ka “Raid”.){kind=link}