Shillong, Nailar 18: Ka seng Hynniewtrep Achik National Movement (HANM) hynne ka sngi Thohdieng, kala byrngem ban ujor shaka National Green Tribunal (NGT) pyrshah iaka Dhar Company halor ka jingkynnoh ba ka khlong maw naka wah Umiam ban tei iaka surok hapoh ka thain Mawhati Ri-bhoi district.
Haba kren sha ki lad pathai khubor, u nongialam ka HANM Ri-Bhoi district bah Bawan Nongsiang ula ong ba kane ka jingkhlong maw beain daka ka Dhar Company naka Wah Umiam ka long pyrshah ruh iaki kyndon ka tnat Public Work Department (Road) bad naka liang ka seng kala dep ruh ban ai jingthoh sha u MD jong kane ka Company hynrei kam shym la sngap iaka jingujor jong ka seng.
U bah Bawan ula iathuh ba ka seng kala ioh jingujor na ki paidbah nongshongshnong ba kane ka jingkhlong maw beain daka Dhar Company kala ktah iaka jingiaid lynti jong ka Wah Umiam kaba ki paidbah ki pyndonkam ia kane ka um.
Ula ong ba ka seng ka kwah ruh ban buh jingkylli iaka Dhar Company, hato kala ioh jingbit ne em naki bor sorkar ban khlong maw na kane ka Wah Umiam ban shna surok hapoh ka thain Mawhati.
“Ngi dawa naka Dhar Company ban pynshai, hato kala ioh jingbit ne em naka NGT, PWD bad na ki bor sorkar ban khlong maw naka Wah Umiam” la ong u bah Bawan.
Haba iadei bad kane u bah Bawan ula byrngem ba lada ka Dhar Company kam lah ban pynshai halor kane, ka seng ha ryngkat bad ki paidbah nong shong shnong naduh Umeit shaduh Sonidan kin ia mih surom bad kin leit ujor ruh shaka NGT pyrshah ia ka Dhar Company.
Pule ruh: Maham ka JSU ia ka KSA ban ym wanrah ia ka jingiakynad hapdeng ki paidbah ha Block-I
PEIT:
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
 hynne ka sngi Thohdieng, kala byrngem ban ujor shaka National Green Tribunal (NGT) pyrshah iaka Dhar Company halor ka jingkynnoh ba ka khlong maw naka wah Umiam ban tei iaka surok hapoh ka thain Mawhati Ri-bhoi district.){kind=link}