Shillong, Naiwieng 04 : Ka seng FKJGP-Langpih Area, kala kynnoh ba ki Pulit ka Assam kila wan ban pynibor biang ha ka thain bad pynsangeh jubor ia ka skhim Um bala pyntrei ha ka shnong Umthli, kaba hap hapoh ka thain.
Kat kum ka jingiathuh ka Seng, ki Pulit ka Assam kila wan ban pynsangeh ia u contractor ba pyntrei ia kane ka skhim Um haba ioh jingtip ba u dang phah kit ia ki pipe um kiba dang poi ha ka shnong Ukiam.
“Kane ka jingleh ki Pulit Assam ka pyni ia ka jingleh donbor khlem da burom ia ka jingdonkam ki paidbah nongshongshnong kiba dei ban ioh ia ka jingmyntoi na katei ka skhim” ong ka FKJGP.
“Ngi dawa jur ia ki bor District ka West Khasi Hills ban tuklar mardor ia kane ka kam khnang ba kan poi um noh sha kane ka shnong haba pynrem jur ruh ia ka Sorkar Jylla kaba lapmiet ban mushlia ia ka suk ka sain ha ka thain” kala bynrap.
Ha kajuh ka por, ka FKJGP kala pynrem jur ruh ia ka jingwan pyntrei jubor jong ka Sorkar Assam ia ka surok MGNREGA ha ka Shnong Noapara khlem da ioh jingbit na ka Dorbar Shnong.
Kala ong ba kane ruh ka pyni ia ka jingkwah leh donbor jong ka Assam khlem da burom shuh ia ka bor ki Dorbar Shnong ha ka thain khappud.
“Ka Seng ka ai ka jingiaroh ia ka Dorbar Shnong Noapara kaba la ieng ryntih ban nym ailad ia ka jingwan leh donbor jong ka Assam” kala ong.
