New Delhi, Risaw 07: Ka tnat central bureau of investigation (CBI) kala kynnoh ia ki bor ba dei khmih jong ka hospital ha Gurugam (Haryana) halor ka jingiap ba kham pher jong ka air hostel kaba dei na ka jylla Nagaland, ka Rosy Sangma.
Ka CBI kala ong ba ka dei lyngba ka jingleh torti ha ka bynta jong ka hospital ha Gurugam (Haryana) kaba la lam sha ka jingiap jong kane ka air hostel kaba dei na Nagaland, ka Rosy Sangma.
Ha kawei pat ka liang, uba shipara arkmie bad ka Rosy u Samuel Sangma ula khlad noh da kaba pynkut hi iala ka jingim hadien ka jingkhlad noh ka kmiesan bad hadien ba ula ngat ha ka jingshah thombor ha ki nongtrei jong katei ka hospital namar ka jingring video ia ka metiap jong ka Rosy katba ka dang don hapoh ka hospital.
Na ka liang ka CBI kala aiti ia ka kaiphot kaba kongsan bha ha kaba iadei bad katei ka jingiap jong kitei ki arngut sha ka National Human Rights Commission (NHRC).
Ia kane ka jingjia la aiti sha ka CBI hadien ka hukum ba la pynmih na ka ministry of home affairs (MHA), kata hadien ka jingioh pdiang ia ka jingujor na u chairman ka Garo Development Council (GDC) kaba don ha Assam, u Alex K Sangma.
Ka Rosy Sangma ka dei napoh Dimapur, Nagaland bad ka shong ka sah ha New Delhi.
La pynkynriah ia ka Rosy shapoh Alfaa Health Care Hospital ha Gurugam hadien ba kala ngat ha ka jingshitom ha ki bynta jong ki kti abd ka kjat ka mon nalor ka jingshitom mih snam.
Ka CBI ha ka kaiphot kala pynpaw ba kala don ka jingleh torti kaba jur ha ka liang ki nongsumar jong ka hospital.
Kane ka kaiphot kala ong ruh ba wat lada ka Rosy Sangma ka don hapdeng ka jingshitom kaba jur namar ka jingmih snam na ka jaka leit shabar pynban la wan sumar ia ka da ka doktor sumar bniat ne dentist.Ia kane ka dentist la wan synran lang ruh da kawei pat ka doktor ka bym dei na ka bynta kane ka jait jingshitom.
“Ki progress sheet jong ki doktor, ki jingtip bala pyntip sha ki pulit,ka por bad ka jingai jingsumar bad ka jingbishar bniah lyngba ki CCTV ki pyni ba ia ki kot ki sla lehse la pynkhreh kham hadien bad ka bym shym la iahap kumba la pyni da u Dr Anuj, Dr Anjali bad ki bor ba dei khmih jong ka hospital,” pynpaw ka kaiphot ka CBI.
“Ha ka por ka jingleit jurip ia ka nongpang, u Dr Anuj ula ong ba ula leit jurip bniah ia ka nongpang da lade hi ha ka por 10.15 mynstep.Hynrei la shem ba kane kam long kaba shisha lyngba ki dur na ki CCTV bad la pynshisha ruh ba um shym la don hapoh kane ka hospital ha ka por 10.15 mynstep bad kumno un lah ban leit jurip ia ka nongpang.
“U Dr Anuj la shem ruh halor ka jingleh bym sngewtynnad pyrshah ia u Samuel namar ka jingring video ka jong u lyngba ka mobile phone hadien kane ka jingkhlad noh jong ka Rosy.Katkum ki dur lyngba ki CCTV, u Dr Anuj um shym la kwah ban pyni ia ki kot ki sla kiba iadei bad ka jingai jingsumar sha u Samuel uba la dawa.U Samuel uba la ngat ha ka jingshah thombor hadien ka jingiap noh ka kmiesan jong u, ula pynkut noh iala ka jingim hapoh ka hotel kaba u shong ha ka sngi kaba bud, kata ha ka 25 tarik u Jylliew ba la dep,” ong shuh shuh ka kaiphot ka CBI.
Katkum ki jingshisha ba la pynshong nongrum ki don ki kyndon pynshitom kiba hapoh ka Section 304-A of Indian Penal Code (IPC) pyrshah ia u Dr Anuj bad ka Dr Anjali. “Ka CBI ka dang pynkhreh ruh ban rejistar case pyrshah ia u Dr Anuj Bishnoi bad ka Dr Anjali Askh halor kane ka jingjia,” ong shuh shuh ka kaiphot.
