Tura, Risaw 01: Ka Ri-lum Garo hynnin ka sngi thohdieng, ka la kynmaw burom ia ka jingiap jong ki 9 ngut ki briew kynthup ki Khynnah skul, kiba la kyllon iap ha ki kteng suloi jong ki Pulit ha ka jingiakhih halor ka ishu MBoSE.
Khathynniew snem mynshuwa, 9 ngut ki briew kila iap ha ka jingiakhih ha Tura bad Williamnagar kaba la kylla long ruh ka sngi ba dumngit tam ha ka histori jong ka Jylla.
Ka jingkynmaw ia kine ki mynsiem ka dang iai bteng ban don ha ka dohnud bad jingmut jingpyrkhat jong ki paid ka Ri-lum Garo, kiba la iamih hynnin ka 30 tarik Nailur ban iasnohkti lang ha ki jingduwai kyrpang bala pynlong ha ki jaka ba ki shah siat iap.
Ha Tura, ka kynhun Victims Solidarity Forum bad ki Seng jong ki samla pule kynthup ia ka Garo Students Union bad ka Tura Government College Students Union, lem bad ki paidbah kila iakynduh lang ha Tura District Auditorium ban pynlong ia ka jingduwai kyrpang bad hadien kane, kila pynlong ia ka jingia iaid paidbah sha madan Chandmari, Tura kaba dei ka jaka ba ki saw ngut ki briew kila kyllon iap.
Kine ki kynhun kila buh syntiew, bad thang mombiti ha u mot sah jingkynmaw bala pynieng ha kane ka jaka.
Ia kum kane ka prokram la pynlong ruh ha madan Rongrenggiri ha Williamnagar kaba dei ka jaka ba 5 ngut ki briew kila shah siat iap ha ki Pulit ha kane ka juh ka sngi.
Ha Tura, u Assistant Secretary General ka North East Students Union Manseng A Sangma ula ialam ia ka jingialang ban kynmaw burom ia kine ki lanot ha ryngkat ka jingiadonlang ki nongialam jong ka GSU ba kynthup ia u President Tengsak G Momin bad u Jerry Sengchang A Sangma uba dei u General Secretary ka TGCSU.
Kala don ruh ka jingia rwai ia ka jingrwai ba kyrpang bad ka jingduwai ha kane ka jingialang kynmaw burom malor ka jing rwai kyrpang bala rwai da ka Pinggira Cultural Society bad u Tenbirth Ch Marak ban kynmaw ia kine ki 9 ngut ki lanot.
Shuwa kane, ka jingialang kala sdang da ka jingiasngap jar ba shi minit.
