SHILLONG, Risaw 21: Ki shipai iada khappud ki shipai Border Security Force (BSF) kumba juh leh man la u snem hynne ka sngi ruh kila pynlong ia ka jingbuh syntiew ha u mot lane ‘Police Commemoration Day’ ba la shna kyrpang ha Umpling ban burom ia kiba la khlad noh ban ia da ia ka Ri.
Ha kane ka sngi ki BSF kila pynlong ia ka jinglehburom ia ki para shipai kiba la aiti ia la ka jingim ban iada ia la ka jong ka Ri bad ia kane ka sngi la rakhe kynmaw burom ha ka 21 bnai Risaw jong man la u snem da ki Pulit ka sorkar pdeng bad kum juh jong ka kylla.
Haba iadei bad kane u Inspector General (IG) ki shipai BSF u Inderjit Singh Rana kum ka dak jong ka jingkynmaw burom ia kito kiba la len lade na ka bynta ka Ri u la buh ia u syntiew ha ka jaka ba la shna kyrpang ha Umpling.
Kum ban shu pynkynmaw ba ia kane ka sngi ‘Police Commemoration Day’ la rakhe ha kane ka sngi 21 bnai Risaw man u snem namar dei ha kum kane ka sngi ba ki shiphew ngut ki pulit kila len lade ban iada ia la ka Ri ha ka jingiakhun pyrshah ia ki shpai ha China ha u snem 1959 ban iada ia u pud u sam ka Ri.
