Nongstoiñ, Risaw 22: Ka tnad pulit ka West Khasi Hills District ha ka 21 tarik ka sngi saitjaiñ ka la rakhe їa ka martyr’s day, ban kymnaw burom їa ki pulit kiba la khlad noh ha ka jingїaleh bad ki kynhun kieng atiar ha kylleng ki jaka.
La pynlong їa ka jingkynmaw burom da ka jingїalang ba lyngkot ha phyllaw jong ka ophis u Superintendent of Police ha Nongstoiñ, ha kaba baroh ki ophisar pulit jong ka District ki la їadon ryngkat. Kiwei pat kiba la wan iashimbynta ki kynthup ia khynnah skul jong ka KJP Synod Sepngi Secondary bad na ka Rev JJM Nicholsrot Secondary school.
Ha katei ka sngi ha shuwa ban pynlong їa ka salute, la pdiang burom їa u bah Garod LSN Dykes Deputy Commissioner ka West Khasi Hills u ba la wan ban їashimbynta lang ha katei ka jingrakhe їa katei ka sngi.
La pynsngew ruh їa ki kyrteng jong ki pulit na ki jylla bapher bapher kiba la khlad ha ka jingїaleh bad ki riew kieng atiar da u Bikram Marak Superintendent of Police West Khasi Hills bad kum ba long ka rukom jong ka tnad pulit, la pynlong їa ka jingsiat suloi lai sien lai wat sha suiñ.
Ha katei ka sngi la donlang ruh kiba haїing hasem jong ki ar ngut ki pulit jong ka West Khasi Hills DEF, kata u (L) bah Betly Ryntathiang Inspector u ba la khlad ha ka 27 tarik Jylliew 2003 ha ka jingїasiat bad ki kynhun kieng atiar ka ANVC bad NSCN ha ki thaiñ Borsora khappud bad ka Bangladesh bad u (L) Rel Deo Sangma constable West KHasi Hills DEF, u ba la khlad noh ha ka jingїasiat bad ki riew kieng atiar jong ka kynhun LAEF ha ka 7 tarik Nohprah 2008 ha Dymmut kaba hap ha Shallang Police Station.
Kum ka dak jong ka jingkynmaw burom їa kitei ki pulit, la pynlong ruh їa ka jingbuh syntiew da kiba haїing hasem jong kitei ki pulit kiba la khlad noh.
La pynbud ruh їa ka jingbuh syntiew da ki ophisar pulit ka district naduh u Superintendent of Police, Commandant ka 4th MLP Bn, Deputy Commissioner, Additional SP, Circle Inspector IBI, SDPO, bad ki Officer Incharge jong ka Nongstoiñ Police Station bad ki khynnah skul.
