SHILLONG, Nohprah 30: Ka Jaiñtia National Council (JNC) hynne ka sngi Baar, kala rakhe kynmaw burom ia ka lyngkhuh sngi iap kaba 163 jong u Kiang Nangbah ha u mot sahnam jong u Kiang Nangbah uba don ha Khliehriat, East Jaintia Hills District.
Ki nongialam bad ki dkhot jong ka JNC kila wan ialum lang ban iashimbynta ha kaban buh syntiew bad ban batskhem ia ka kular ban iada ia ka khyndew ka shyiap, ka riti ka dustur bad ka jinglong tynrai ki Jaintia.
Haba kren ha ka jingialang u President ka JNC u Sambormi Lyngdoh ula ong “Ha ka por jong u Kiang Nangbah, ki bor phareng kila ialam bakla ia ki nongialam shnong bad ia ki Dolloi jong ki elaka, da kaba iuhroit ia ki riti dustur tynrai”.
“U Doloi ka Nartiang Elaka ula lum ia ka jingialang kaba heh duh ha ka histori ka rilum Jaiñtia bad katei ka jingialang kala rai ban pyrshah jur ia ki bor kiba nabar ri kiba pynthohbria ia ka riti dustur bad ia ka kolshor jong ki Pnar bad hadien la mih u Woh Kiang Nangbah uba la ialam ia ki paitbah ki jong ngi ban iakhun pyrshah da ka jingbitar”.
Ula pynkynmaw ia ka jingleh kaban sah jingkynmaw haba u Kiang Nangbah ula ngam hapoh ka wah Myntdu ban shim biang ia ki sla kyntang bad rah kum ka dak jong ka jingiatylli.
“Haba kine ki 3 tylli ki sla jyrngam kila iasoh lang, kumta ruh ngi dei ban iatylli ha ka jingthmu, ka bor bad ki nongrim, ban iada ia ki shnong ki thaw shi rta. Kane kam dei tang ka shap, hynrei kadei ka jingpyrta ia ka thma na ka bynta ka jingiatylli ki Jaintia kaban ym lah ban pynpra”.
U Bah Lyngdoh ula byrngem ba kane kajuh ka rukom jong ka jingiuhroit kala sdang biang, ha kaba ka sorkar bad ki riewshimkabu kiba nabar kila pyndonkam da ki buit kiba jaboh, ban pynbiej ia ki nongialam shnong bad elaka da ki jingai jingkular kiba thok ban ioh seng ia ki karkhana dew bilat ha ka khyndew ka shyiap jong ki pateng ki barim bajah, ban leh ia ka kam tih kaba pynjot bad ka jingshimkbau jong ki karkhana”.
Ula kdew ruh ba ka “Jingshet kylla ka Shree Cement ha Daistong, ka jingwan rah ia ki nongbylla da ka Amrit bad ka jingkyntur pud ha ki thain khappud da ka jylla Assam” kadei ka jingleh kaba mynta kumba la shah leh ne shah knieh ki jaka ki puta ha ka jingsynshar ki phareng mynshwa.
Ula ong, “Ka jingshah pyniap u Kiang Nangbah kadei namar ka jingshah shet kylla ha ki langiong kiba na ngi, mynta ngi smai ba ngin ym ailad shuh ia kum kine ki sieñpuh. Kum ki khun shynrang jong kane ka khyndew kaba kyntang, nga khot ia baroh ban iatylli da ka mynsiem kaba khlain kum u sla uba na ka wah Myntdu, ban pynmih ia kawei ka jingiohi jngai, kawei ka jingkhlain kaba yn ym lah ban pynpra bad kawei ka nongrim kaba khlain ban shim biang ia u pud u sam jong ka rilum Jaintia. Ka sorkar ka lah ban jynthud, ki elaka ki lah ban kyntait hynrei ka JNC ka ieng kum ka kti kham jong u Kiang Nangbah ha kaba da ka jingiatylli ngin jop bad lada phin ngin hap. Yn ym don ki langiong kiban lah ban pyntlot ia ka kyrdan, ngi ngin beh ia ki, ngin thad madan ia ki bad ngin pynduh ruh ia ka syrngiew ka jongki”.
 hynne ka sngi Baar, kala rakhe kynmaw burom ia ka lyngkhuh sngi iap kaba 163 jong u Kiang Nangbah ha u mot sahnam jong u Kiang Nangbah uba don ha Khliehriat, East Jaintia Hills District.Ki nongialam bad ki dkhot jong ka JNC kila wan ialum lang ban iashimbynta ha kaban buh syntiew bad ban batskhem ia ka kular ban iada ia ka khyndew ka shyiap, ka riti ka dustur bad ka jinglong tynrai ki Jaintia.){kind=link}