Shillong, Nohprah 21 : U Myntri Rangbah ka Jylla Conrad K Sangma ha ka sngi Palei, ula ong ba ka Jylla kala kynjoh ia u mawmer ba kyrpang da ka jinglah ban kot haduh 4,71,544 tylli ki Longiing kiba la ioh ia ka kor um ba treikam ha Iing, kaba kot haduh 72.37%.
Ka Meghalaya kala tam mynta wat ia ka National Average ha ka jingpynpoi kor um ha ki thliew iing jong ka Jal Jeevan Mission (JJM) kabala kot 72.1%.
Ka Meghalaya kala nang beh ia ka thong ban kynjoh ia ka 100%, kaba pyni ia ka jingaiti met bad mynsiem jong ka kynhun ba pyntreikam ia ka Jal Jeevan Mission (JJM) hapoh ka Jylla.
Haba pyntip ia kane hapoh ka X (ba tip mynshuwa ka Twitter), u Myntri Rangbah ula ong “Sngewkmen ban pyntip ba ka Meghalaya kala kynjoh 4,71,544 (72.37%) ka jingtreikam ki kor um iing kaba long palat ia ka National Average ba 72.1%. Khublei shibun ia ka kynhun @jjmmeghalaya kaba iai bteng ban trei shitom ban pynthikna ba ka Meghalaya kan kynjoh ia ka thong ba 100% ka jingioh kor um iing”.
Happy to share that Meghalaya has reached 4,71,544 (72.37%) Functional Household Tap Connections which is above the national average of 72.1%. Congratulations to team @jjmmeghalaya who continues to work diligently to ensure Meghalaya reaches its target of 100% FHTCs.@gssjodhpur…
— Conrad K Sangma (@SangmaConrad) December 21, 2023
Lah ban kdew hangne ba ia kane ka Mission la sdang pyntreikam naduh u Nailar 2019 lyngba ka jingiatrei ryngkat hapdeng ka Sorkar India bad ki Sorkar Jylla. Ka JJM kala buh ia ka thong ban pynioh ia ki kor um iing ha baroh ki shnong Nongkyndong, ka ban pynthikna ba ki longiing kin ioh ia ka um kaba khuid shuwa u snem 2024.
Haba iakren bad ki nongthoh khubor, u Myntri Rangbah ka Jylla ula ong “Nga dang shu ioh ia ka jingtip ba ka Meghalaya kala tam iaka National Average bad lada phi kynmaw, ha ka por ba ngi sdang ia kane ka mission ka long tang 0.75% kaba duna tam hapoh ka ri hynrei mynta daka jingtrei shitom jong baroh ki Engineer, ki ophisar, ki tnad sorkar bad ki Myntri sorkar mynta ka sngi ngi la tam ia ka National Average”.
U Myntri Rangbah ula pynpaw ba u ngeit skhem ba ha ka por kaba lyngkot ka Jylla kan sa lah ban pynurlong ia ka jingbuh thong ban long napdeng ki katto katne ki jylla ban pyndep iaka 100% haka jingpynpoi ia ka um ha ki iing ki sem.
“Watla ngi buh ia ka thong ban pyndep kloi ia kane ka projek, hynrei kila don pat ki jingeh kiba mih ha kaba iadei bad ka jingsam ia ka umbam umdih bad ka jingeh hi, ka dei ki tyllong um. Ngi la iatreilang bad baroh ki tnad kiba don bynta kum ka Water Resources, Soil Conservation, Forest bad kiwei kiwei ki tnad ban peit kumno ban iakhun ia ki jingeh kiba ngi mad” ula ong.
Ula ong ba ia kane ka Mission la buh thong ba dei ban pyndep ha u bnai Lber 2024 hapoh ka ri India baroh kawei bad kumba iohi hi, bun ki jylla kin ym lah ban poi sha katei ka thong, hynrei yn peit pat ba lada ka Meghalaya kam lah ban kynjoh ia ka 100% ka dei pat ban poi sha ka 90% ha u Lber.
