Shillong, Nailur 02: U Symbud Myntri Rangbah ka jylla u Bah Prestone Tynsong u la pyntip ba ka pule puthi kala kiew bha ha ka jylla haba ianujor bad ki snem kiba la leit bad mynta la jan kynjoh 80% kiba la nang la stad bad ka sorkar kala bhah tyngka haduh T.4500 Klur sha ka pule puthi.
U Bah Prestone u la kren ia katei, haba pynshai iaka jingkren jong u MLA ka North Shillong Bah Adelbert Nongrum ha ka jingrakhe iaka jingdap 131 snem jong ka Mawkhar Christian Higher Secondary School bad ka jingdap 10 snem jong ka Higher Secondary Section.
“Khyndiat ngam sngew iahap iaka jingkren jong u Bah Adelbert ba ka sorkar kam shim la leh eiei watla ka jylla kala kynjoh sha ka rta kaba 50 snem” ong u Bah Prestone.
“Ngan iathuh ma nga ia phi bad ia baroh halor ka histori ha katei ka por kat kum ki rekod. Ha u snem 1972 ka jingnang jingstad ki briew ha Meghalaya kam kot wat tang 25% ruh bad haba ngi rakhe iaka jingdap 50 snem ka jylla ngi lah jan kynjoh sha ka 80%” ula bynrap.
Haba kynthoh ia ki jingkren u MLA ka North Shillong, ula ong “Hato phi mut ban ong, ba haka jingrakhe iaka jingdap 50 snem ym shim la jia eiei ruh em. Ha u snem 1972, ka mang tyngka jong ka sorkar jylla haka pule puthi ka long tang T.300 Klur hynrei mynta kala kot palat iaka T.4500 Klur. Hynrei ngi dang donkam ban leh eiei shuh kham bun”.
U Bah Prestone, u la ong, ha kaba iadei bad ka Recurring Expenditure haka pule puthi man la u snem, ka sorkar ka la pynlut ym duna iaka T.2000 Klur bad dang shen haba pynkiew iaka Grant in Aid jong ki nonghikai Adhoc, la hap ban pynkiew ia ka bhah tyngka sha ka T.300 Klur man la u snem bad ka sorkar kala leh bad kan iai bteng ban leh shuh shuh.
Hashwa katei, u Bah Adelbert Nongrum haba kren kum u kongsan symbud u la ong, “Khlem ka jingtrei shitom, khlem ka jingaiti met bad mynsiem bad khlem da mih ka umsyep ngin ym lah ban iohi ia ka lawei kaba tynshain namar ngi don hapdeng ka jingtynjuh kum ka jylla”.
“Sanphew snem ka Jylla ka khlem kiew, ka synjor, ka khlem skhem, mano ba shim iaka jingkitkhlieh bad dei ma ngi iwei pa iwei ban pynskhem iaka lawei jong ki longdien bad ki pateng kiban dang wan khamtam iaka pule puthi kaba ngi hap ban sdang biang naduh ba sdang” ula ong.
“Mut ia kaba bha, kren ia kaba shisha bad leh ia kaba dei, hynrei mano ba nud ban kren, im ne leh iaka jingshisha, da leh iaka jingshisha ka jingim jong nga shimet la synjor, na kata ka daw ka jylla baroh kawei kala synjor, ka jingbym shngain ka la shong haka rukom pyrkhat jong iwei pa iwei i nongshong shnong jongka jylla” ong u Bah Adelbert.
