Itanagar, Nohprah 27: Ka Itanagar kaba dei ka Nongbah ka Arunachal Pradesh ka la kynjah jar mynta ka step sngi ba Ar hadien ka jingkhot pakhang shnong ba 12 kynta jong ka seng All Nyishi Students Union (ANSU) namar ka jingbym lah ban pynurlong ia ka jingdawa ka jong ka halor ka jingtohkit CBI kaba dang iai bteng ha kaba iadei bad ka jinglaittuh ka jingkylli eksam ba la pyniaid da ka Arunachal Pradesh Public Service Commission (APPSC).
Kane ka jinglaittuh ka jingkylli ka la jia ha ka por ba la pynlong ia ka eksam na ka bynta ka post assistant engineer (civil) ba la pyniaid da ka APPSC ha ka 26 bad 27 tarik u Nailar mynta u snem. Kane ka jinglaittuh ka la paw pyrthei ha ka 29 tarik Nailar hadien ba ki bor pulit ki la ioh pdiang ia ka jingujor na uwei u nongiakhun ia katei ka eksam uba kyrteng u Gyamar Padang, uba la kam ba u suba jur halor ka jinglaittuh ki jingkylli.
Ka ANSU ka la pynbna ia ka jingiakhih ha ka kylla kaba nyngkong lyngba ka pakhang shnong kaba 12 kynta mynta ka 27 tarik Nohprah kaba la sdang naduh ka por 5 baje mynstep haduh 5 baje janmiet hadien ba ka sorkar jylla ka la pulom ban pynurlong ia ki 13 tylli ki mat jingdawa kiba iadei bad katei ka jinglaittuh ki jingkylli eksam ba la pyniaid da ka APPSC.
Na ka liang u Myntri kam pohiing ka Arunachal u Bamang Felix ula kyntu ia ka ANSU ba kan weng noh ia kane ka jingkhot pakhang shnong hynrei na ka liang ka seng kam shym la pynsngap satia.
Lah ban kdew ba ki bor pulit ka Arunachal ha ka 5 tarik Nohprah ki la kem noh ia u deputy secretary cum deputy controller ka APPSC u Taket Jerang (53 snem rta); u AE exam candidate u Thomas Gaduk (26); u nonghikai ka Joeju Institute u Akhilesh Yadav; u head assistant uba dei ruh u kpa jong u Thomas Gaduk, u Tanyang Gaduk (57); u GPS Tarak Pangin; junior teacher Tama Saroh (53 snem rta); bad u nongpyniaid ia ka courier u Dilip Saha lem bad laingut kiwei pat.
