Shillong, Iaiong 28 : Ka Iew ka hat ha Shillong kala kynjah slam slam bad wat ka Iew ba hehduh ka Jylla ruh, kala kynjah namar ka jingkhang dam jong ki dukan ban pyni ia ka dak ka jingiatylli bad ka jingsngewlem ia ki lanot kiba iap ha ka jing hiar thma ki lehnoh ha Pahalgam, Kashmir.
Baroh ki dukan khamtam ki dukan jong ki nongkhaii bar jylla kila pynhap lut ia ki shutter ha ka thain Police Bazaar bad kumjuh ruh ha Iewduh lait noh ki katto katne ki dukan ki Khasi kiba plie.
Kane ka jingiakhang dukan ka dei ka dak ka jingiasnohkti bad ka jingkhot jong ka Shillong Citizen’s Forum (SCF) lem bad ka Barabazar Merchants and Traders, ban iakhang lut ia ka khaii ka pateng ha ka jingialang thang mombiti ba long hynnin ka sngi ha Khyndailad.
Ha ki thain Khyndailad, Iewduh, Garikhana, Jhalupara, Polo bad kiwei kiwei ki jaka ruh, ka jingiakhang ia ki dukan kala trei kam ryntih da ki paid nongkhaii.
Lah ban kdew ba ia kane ka jingkhang pakhang dukan, la pyrshah jur da ka seng HITO kaba la mudui sha ki bor pyniaid District bad kumjuh ruh ka Mahila Congress.
Ki Nongkhaii kila khein ia ka jinghiar thma ia ki lui lui ha Pahalgam kum ka kam khawpud bad dawa ia ka Sorkar ban leh da kaba tyngeh pyrshah ia ki kynhun lehnoh bad ki ba donbynta ha lyndet namar kane ka kam pyntriem ba shyrkhei.
