Shillong, Nailur 15 : Hadien ka jingkyndang ka Jylla Assam ia ka jyrsieh khaii online ba T.2,200 klur, mynta pat sa ka Tnad Meghalaya Police, kala sei madan ia ka jyrsieh Online ba kot da ki phew klur ha Jylla Meghalaya. Watla ym pat lah ban pynthikna haduh katno ka poi ka kam thok kam shukor hynrei ki khubor ki antad ba ka pisa bala thok ka long kaba la bun bah.
Kaei kaba shai ka long ba palat 700 ngut ki briew kila ngat ha kine ki kam shukor ban kynshew ha ki sheme thok lyngba ki application bapher bapher. Haduh mynta, ka Tnad Pulit kala lah ban khang (block) ia ka pisa ba kot haduh T.2.42 klur na ka jingsei jong ki riewshukor, kaba ieh ia kiba bun ki lanot hapdeng ka jingkyrduh pisa.
Kane ka jyrsieh ka dei kaba treikam lyngba ka “Datameer” lane “DAAI” app, kaba la ieh ia ki spah ngut, lada ym dei da ki hajar, hapdeng ka jingma ban duh ei ia ka pisa ba kila pynmih umsyep. U Superintendent of Police (Sadar) bad Cyber Wing, Pankaj Kumar Rasgania, ula pyntip ia kane ha ka jingiakren bad u nongthoh khubor.
U Rasgania ula batai bniah bha ia ka jingkiew sted ki kam thok kam shukor lyngba ka kor Internet (cybercrime) hapoh ka Jylla khamtam ha ka jyrsiej kynshew pisa online. “Ha kine ki arsnem bala leit, ngi la iohi ia ka jingkiew bha ka jyrsiej online ha Meghalaya. Kawei ka app, DAAP, ka kular ban pynioh nong haduh 40% na kaba kynshew, kaba la pynbiej ia ki briew ba kin thep ia ka pisa jong ki” ong u Rasgania.
Ula batai shuh shuh ba u briew ba donkti hakhmat eh ula tip shaphang kane ka jyrsieh lyngba ka social media, bad ula ioh kamai, kaba pynshlur ia u ban thung briew lyngba ka Whatsappp group bad kiwei ki jingiakynduh offline. Hynrei, hadien khyndiat bnai, kane ka app kala shu jah noh hadien ba sei ia ka pisa, kaba pyni pyrthei ba ka dei ka kam thoh.
U Rasgania u pyntip ba ki don phra tylli ki case bala register bad ki jingtohkit kila iaid naduh na Ri-lum Garo bad Khasi Hills ruh. Nalor kata, kine ki kam shukor ki don ruh kiba don jingiadei bad kiwei pat ki Jylla ka Ri lem bad nabar ri ruh kumjuh khamtam ha Hong Kong.
Da ka jingkloi ban tuklar, ki Pulit kila lah ban iada ia ka kam shukor kaba kot haduh T.2.42 klur.
Haba batai ia kane, ula pyntip ba ha ka jingtohkit ia kiba bun ki kam shukor online, ka Tnad Cyber Wing ka Meghalaya lyngba ka National Cyber Crime Reporting Portal, kala lah ban khang ia ka jingsei haduh T.2.42 klur da ki nongshukor. Ua batai ba ki lanot kiba pyntip ia kine ki kam shukor, kila ioh pat ia ka pisa tang hapoh ka 24 kynta.
Ki Lad jingirap bad ka jingiaid ki jingtohkit
U Rasgania ula kyrpad ia ki nongshongshnong ba kin long kiba phikir bha, ban kiar na ka jingdie iala ki bank account bad ki SIM card, kiba ju pyndonkam bha da ki nongshukor online. Shisien ba kine kila iasoh bad ka jysieh, ka bank account bad ka SIM card ki lah ban shah block. Ka jingtohkit ka iathuh ba ki nongshukor ki ju pyndonkam ia kijuh ki app, kum ka “TAAI” da ki jingpynkylla ia katto katne ki kyrteng ban pynbteng ia ki kam bymman khlem da shah bat.
U Rasgania ula pynshlur ia ki lanot ba kin pyntip mar mar ia ki kam shukor online lyngba ka National Cyber Crime Reporting Portal (cybercrime.gov.in) lane helpline 1930, nama ka jingpyntip dang kloi ka dei ka lad ban lah ioh biang ia ka pisa bala duh.
Nang kiew ki kam shukor online ha Meghalaya
U Rasgania ula ban jur ia ka jingkiew sted ka kam shukor online ha Meghalaya haba pyntip ba ki jingpyntip sha ka National Cyber Crime Helpline (1930) kila kiew haduh phra shah ha kine ki arsnem bala leit noh. “Ha u 2022, ngi ioh pdiang 1069 tylli ki call bad ha u 2024, ngi la dep ioh haduh 8414 call” ula ong. Ka jingujor sha ka cybercrime.gov.in ruh kala kiew bun shah, kaba long na ka 9 ha u 2019 sha palat 1000 mynta u snem.
U Rasgania ula ai nuksa kumno ban ithuh ia ki kam shukor/jyrsieh, kum ka jingkular ban ioh kamai heh (bunsien kaba long palat ia ka 10%), ki kam kiba iaid lyngba ka whatsapp lane telegram bad ki jingsiew lyngba ki UPI ID lane ka jingpynkylla ia ki bank account. Kine baroh ki dei ki lama saw jong ki kam shukor online.
