Nongpoh, Lber 21: Kawei ka bos Night Super kaba mih na Guwahati ban leit sha Silchar, kala kylla khongpong ha kawei ka surok khongdong jong ka shnong Shangbangla, Ri-Bhoi District bad ha kane ka jingjia, bun ngut ki briew ba shong ha kane ka bos, kila mynsaw jur.
Kane ka bos ka dei kaba don u nombor AR-20-9099 bad ka kit haduh 37 ngut ki briew na Guwahati ban leit sha Silchar. Kane ka jingjia hynnin ka miet, ong ka khubor Pulit haba pyntip ba kane ka bos, nalor ka kit briew, kala kit ruh ia ki jhur ban pynpoi sha Silchar.
Kat kum ka jingong jong ki, ka daw jong ka jingjia ka dei namar ka jingniah kali khlem akor jong u nongniah kane ka bos, uba la pynher sted ia ka kali haduh ba um shym la lah ban tehlakam ia u string, kaba lam sha ka jingryngkoh na kawei ka liang sha kawei pat (lane).
Ki Pulit ki iathuh ba bun ngut ki briew ha kane ka bos, kila mynsaw jur bad la pynkit ia ki sha Nongpoh Civil Hospital. Ki iathuh ba ki don ruh katto katne ngut kiba kham jur ka jingmynsaw, la pynkit noh sha Guwahati ba kin ioh ia ka jingsumar ba kham paka.
Haba iakren bad I Kong Besterlin Lawryniang, Nongshongshnong ka Shangbangla ila ong ba bun ki jingjia aksiden kila jia ha kane kajuh ka khongdong bad u ju iohi la bun sien ia kum kine ki jingjia namar ba i dei iba shong dukan harud jong kane ka surok.
Ki Nongshongshnong ka Shangbangla kila kyrpad ia ka NHAI kaba peit ia kane ka surok ba kin buh noh ia u Speedbreaker khnang ba yn lah ban tehlakam ia kum kine ki jingjia aksiden.
