Nongpoh, Jymmang 27: Uwei u Nongniah kali jong ka Bolero Pickup, ula iap hashen bad 6 ngut kiwei pat kila mynsaw, hadien ba ka kali ba ula niah pynher sted bha, kala kylla khongpong bad leit rat ia kawei pat ka kali kaba dang wan kiew mar pyrshah ha surok National Highway-6.
Kane ka Bolero pickup ka dei kaba don u nombor ML-05-AB3102. Kane ka jingjia kala jia hynnin ka step sngi U Blei ha ka surok NH-6 ha shnong Umran.
Kat kum ka khubor Pulit, une u nongniah ka Bolero pickup ba khlad u kyrteng u Stanphan Ryntathiang ba 21 snem na ka shnong Patharlyndang, Eastern West Khasi Hills District.
Arngut kiba iadonlang bad u, kila mynsaw bad kine ki kyrteng u Briksius Mawlong ba na Mawkriah bad u Kamwadathmu Hadem na West Jaintia Hills District.
Ki pulit ki iathuh ba u nongniah jong kane ka Bolero ula pynher sted bha ia ka kali haduh ba ka kali kala kynthih ia ka jingker liang jong ka surok (divider) bad kylla khongpong hashuwa ban rat ia ka Maruti Swift Desire ba dang kiew na ka thain Guwahati, kaba don u nombor AS25-DC-9118.
Ki Pulit ki iathuh ba 4 ngut ki briew kiba shong ha ka Maruti Swift kila mynsaw jur kynthup uwei u khynnah ba dang lai snem. Kine ki kyrteng u Mahesh Balmiki (34), ka Deepa Das Balmiki (28) bad ka Minoti Das (46). Ia kine kiba mynsaw la pynkit noh mar mar sha ki jaka ai jingsumar ha Guwahati.
