Shillong, Jylliew 10: U Myntri ka pule puthi u Bah Lahkmen Rymbui ha ka sngi Balang, ula iawer ia ka rukom treikam kaba iar bad kaba lah ban weng ia ki jingeh ha kaba iadei bad ki Central Education Schemes ha ka thain shatei lammihngi ka ri, da kaba pynpaw ia ka jingeh ha ka jinglong jingman ki jaka kiba longriat bad bad ki jingtynjuh kiba kyrpang ha kaba iadei bad ki jingdon jingem ha ka thain.
U Bah Rymbui ula kren ia kane ha ka jingplie ia ka Regional Workshop on Implementation of RUSA/PM-USHA for North Eastern States kaba la pynlong ha State Convention Centre, Shillong.
Ia kane ka jingialang la pynlong da ka Department of Higher Education, Ministry of Education ka Sorkar India ha kaba la lumlang ia ki heh ophisar na ka jylla Arunachal Pradesh, Assam, Manipur, Meghalaya, Mizoram, Nagaland, Tripura bad Sikkim.
Haba ai jingkren u Myntri ula banjur ia ka kamram jong ka pule puthi ha kaban tei ia ka ri bad ula pynpaw ia ka jingkut jingmut ka Sorkar Jylla hapoh ka jingialam u Myntri Rangbah u Conrad K. Sangma.
“Ka pule puthi kala iai neh ban long ka mat kaba hakhmat eh ia ka Sorkar Jylla bad ngi donkam ban pynkhlain ia ki jaka pule ha ka Higher Education ban pynurlong ia ka jingiohi jngai ban pynlong ia ka ri India kaba kiew shaphrnag hapoh u snem 2047” la ong u Bah Rymbui.
Haba kubur ia ka jingdon ka jingkylla lyngba ka National Education Policy, ula pynpaw ia ki jingeh kiba la iai mad ha kaba iadei bad ki jingtei bad ki jingdon jingem bad ka jingpyniaid ia ki projek.
Ula ong, ba ka jinglong jingman ki jaka kadei kawei na ki mat kaba buh ha ka jingeh kaba khraw ia ki jylla ka thain shatei lammihngi ka ri.
“Wat haba la ioh ia ki jaka kiba biang, ka jinglong riat bad ka jingdon ia ki khohruh khohram kala pynduna noh ia ki kam pynroi jong ki jingtei. Ki jaka riat kiba eh, ka jingbym ioh ia ka jaka, ka jingeh ha kaban pyniasoh, ka jingeh ha kaba iadei bad ka jingbym biang ka rukom pynwandur pynwandar ka long ka daw jong ka jingslem ban pyniaid shakhmat ia ki projek watla ai ia ka jingkitkhlieh ia ki jaka pule kiba dei ban ioh jingmyntoi bad ia ka sorkar jylla” ula kdew.
Da kaba ai nuksa na ka jylla Meghalaya, u Bah Rymbui ula kyrpad ia ka Sorkar Pdeng ban pdiang ia kitei ki jingeh kiba shisha haba pyllait ia ka pisa bad ban khmih bniah ia ki projek.
“Nga kyrpad ia ka Ministry of Education ba kadei ban bteng ban shim ia ki lad kiba iar bad ban weng ia ki jingeh ha ka jingpyntreikam ia ki projek bad ha ka bynta ban pyllait ia ka pisa, da kaba pdiang ia ki jingshisha jong ki jingeh kiba long kyrpang jong ka thain” ula ong.
U Myntri ula banjur ba ka jingseisoh jong ka jingpyntreikam ia ki projek kiba iadei bad ka pule puthi ka donkam ia ka jingiatreilang bad kiwei kwiei nalor jong ka sorkar.
“Ka jingseisoh jong ka jingpyntreikam ia ki projek ha ka pule puthi ka donkam ia ka jingiashimbynta shitrhem jong ki jaka pule, ki shnong, ki bor pyniaid shnong, ki tnad sorkar” ula ong bad ka bynrap ba ka Meghalaya ka dang trei ban pyniar ia ki lad lyngba ki jaka pule kiba thymmai bad ban pynkhlain ia ki college bad University kiba lah don lypa.
Ha kane ka jingialang kaba ar sngi, kan khmih bniah ia ka jingpyniaid ia ki kam ki jam, ka jingpyndonkam ia ka pisa bad ki buit treikam ban pyndep ha ka por kaba la buh ia ki projek kiba dang sahteng jongka RUSA bad PM-USHA ha kylleng jong ka thain shatei lammihngi.
U Joint Secretary ka Department of Higher Education u Avni Gupta Pethia, u Commissioner & Secretary u Vijay Kumar Mantri bad kiwei ki heh ophisar na ka Ministry bad ki Jylla ka thain shatei lammihngi kila wan ban iashimbynta ha kane ka jingialang.
