Shillong, K’lyngkot 16 : U Myntri Rangbah ka Jylla Conrad K Sangma ula pyntip ba ka Sorkar kala pyrshang ban wad ia ki lad ki lynti ha kaban pynbeit ia ka kam iadie iathied jaka, ka ban plie lynti ha kaban lah pyndep noh ia ka jingker sainar shiah ha khappud India-Bangladesh.
Kat kum ka jingong jong u, sa kumba 50-60 km na ka 443 km ka khappud ka dei kabym pat ker sainar satia namar ka jing pyrshah na ki trai nongshongshnong.
Haba iakren bad ki nongthoh khubor, u Conrad ula ong “Ha kine ki jaka, ki don ki jingsngewkhia bala pynpaw da ki trai shnong. Ka long kaba eh ia ka Jylla jong ngi namar ka riti bat khyndew bad kumta, ngim lah satia ban shu leh da ka bor bad ngi donkam ban shim ia ka jingiatreilang ki paidbah”.
