Shillong, Risaw 14: U Myntri Rangbah ka jylla Conrad K Sangma ula pyntip ba ka sorkar jylla ka dang wad ia ki lad ki lynti kumno ban pynbiang iaka kad liengsuin kiba don hapoh ka jylla khnang ban kyntiew iaka jingwan ki nongwan shang suwari na kylleng ki ri jong ka pyrthei.
U Conrad ula ong ba ka sorkar kam len ba ka jylla Meghalaya ka dang duna bha ka jingwan ki briew lyngba ki Liengsuin hapoh ka jylla namar ki Liengsuin baheh kim pat lah ban wan hapoh ka Kad Liengsuin Umroi.
“Hapoh saw snem duna, ka Kad Liengsuin Umroi watla ka dang dei kaba rit bha hynrei la iohi ia ka jingwan jong ki Lengsuin rit, kaba ka pyni ba ki nongwan shang suwari na kylleng ki jylla ka ri India bad kiwei ki ri ki kwah shisha ban wan shapoh ka jylla lyngba ki Liengsuin” ula ong.
U Myntri Rangbah ula ong ba katkum ki kyndon Instrument Landing System (ILS) ka kad Liengsuin Umroi kam pat lah ban pdiang iaki Liengsuin heh bad dei namar kane, ka sorkar jylla ruh ka dang wad ia ki lad ki lynti kumno ban pynbit pynbiang iaki jingdonkam jong ki Liengsuin heh khnang ban pynthikna ba ki lah ban wan shapoh ka jylla.
U Conrad ula iathuh ba ka sorkar ka pyrshang ruh ban wad jaka ban tei Kad Liengsuin thymmai namar kala donkam palat iaka nongbah Shillong bad iasoh lyngba ki liengsuin bad kiwei ki nongbah ka ri India kum ka Hyderabad, Kolkata Chennai, Bangalore, Mumbai bad Delhi.
“Ka sorkar ka don jingthmu ruh ban pyniasohia ka Nongbah Shillong bad ka Dhaka, Bangladesh kum shi bynta ban kyntiew iaka kam jngohkai pyrthei hapoh ka jylla” ula ong.
“Lada ka nongbah Shillong ka iasoh bad ka nongbah Dhaka daki liengsuin, kane kan kyntiew bha iaka kam jngohkai pyrthei namar ki briew ruh kin kham shngain bad kham suk ban wan lyngba Shillong ban leit sha kiwei ki jylla ne ki nongbah ka ri India” la ban biang u Conrad.
U Conrad ula ong ba ka kam jngohkai kai pyrthei hapoh ka jylla kan kiew bha lada ka jylla khamtam ka nongbah Shillong ka biang lut iaki jingdonkam kum ki jaka sah lane ki Hotel, ki surok, ki kali bad kiwei kiwei de.
“Kam long kaba suk ban pynbit pynbiang iaki kad liengsuin hynrei naka liang ka sorkar kan ialeh katba lah ban wad jaka thymmai ne ban pyntrei iaki kad liengsuin katkum ki kyndon naka bynta ka leit ka wan ki paidbah” ula ong.
