Nongstoiñ, Nailar 22: U Babu lane u nonghikai skul u ba la shah kthong ha ki pulit Assam, u angnud dik dik ba ka sorkar kan pynbeit kloi noh ïa u pud u sam, khnang ba un leit phai noh sha ka shnong trai jong u kaba dei ha Mawlan jong ka thaiñ Langpih.
Une u babu la tip kyrteng u babu Dilistar Syiemlieh u ba la shong la sah mynta ha ka shnong Domwahlang kaba don ha ki thaiñ Umyïap West Khasi Hills la palat laiphew snem.
Ha ka jingïakynduh bad u nongthoh khubor, la ïoh ban ïakren bad u ha kaba ïadei bad ka jingjia kaba la pynlong ïa u ba u hap ban mih noh na shnong bad ban wan shong wan sah ha Nongstoiñ.
Na ka liang u ne u rangbah u la ïathuh ba ha ka por ba u dang don ha shnong Mawlan la bun bun phew snem mynshwa, u dei u Head teacher jong ka Mawlan Deficit L.P Skul.
U la ong ba ha katei ka shnong ka don ka khlaw kaba rben bha, kaba dap da ki dieng rai, tanglung, dieng phiang, dieng sal bad kiwei kiwei ki dieng ba rem dor bha bad ïa katei ka khlaw la registar da u Syiem Rambrai uba dang khmih lang ia ka Raidmynsaw ha kine ki por.
“Ha katei ka por, kala don ka jingpom tuh ia ki dieng bad la die sha uwei u Nongkhaii dieng ba na Nongstoin. Ka la don ka jingpyrshah kaba jur ia kane ka jingpom dieng haduh ba kala mih ka jingiakajia kaba jur bha” ula ong.
“Ki don katto katne ki Rangbah na Mawlan bad Langpih kiba la leit ujor sha ki Pulit Assam pyrshah ia u, ha kaba ula shah kem bad shah rah sha phatok kaba don ha Guwahati” ula bynrap.
Une u Rangbah u iathuh ba hadien artaiew, u (L) bah Hopingstone Lyngdoh u la wan sei noh ia u na phatok bad wan phai biang sha shnong, pynban ki pulit Assam ki la pyndik da kaba khot hajir ia kaba ula ialeh pyrshah. U iathuh ba ki Pulit ka Assam kila wan wad ia u sha Iing ban kem biang, kaba la pynlong ia u ban phet noh na Iing.
U la ïathuh ruh ba ki Pulit ka Assam namar ba kim lap ïa u, kila kem lut ïa ki syiar, ki blang bad ïa ki sñiang ba set ha sem bad ki sa teh da ki jyrmi na ki kjat bad suh da u dieng bad rah sha Langpih bad ïa bam sngewbha.
U la ïathuh ruh ba da ki bnai bad da ki snem, um nud shuh ban shong ha ïing. Hynrei u shong beit hapoh khlaw bad phah wan on ja ha ki khun bad mynmiet pat u thiah ha ki synrang maw, ha ki krem katba kynduh tang ban lait na ka jingshah kem ha ki pulit Assam.
Hadien ba um lah shah shuh um banse ban mih noh na shnong bad wan sah ha Nongstoiñ ha kaba u la poi shongkha bad kawei pat ka briew.
Tangba u ne u babu, u la ong ba lada ka sorkar Meghalaya bad ka sorkar Assam ka la dep bad ïa pynbeit ïa u pud u sam bad ka shnong jong u ka hap ha West Khasi Hills, un leit phai biang khlem jingartatien ei ei ruh em. Hynrei, katba ym pat lah ban pynbeit ïa u pud u sam un ym lah ban leit phai, namar u sheptieng ïoh ki pulit Assam kin wan kem biang ïa u.
