Shillong, K’Lyngkot 30: Ki nongkyrshan u kyrtong ka National People’s Party (NPP) na Ranikor konstitwensi u bah Martin M Danggo hynne ka sngi kila pynïasoh bad ka seng Bharatiya Janata Party (BJP).
Kumban shu pynkynmaw ba u bah Martin M Danggo ula dei lypa u kyrtong ka NPP na Ranikor konstitwensi naduh ba u mih noh naka Congress ban iakhun iaka ilekshon shiteng samoi ha u snem 2018 hynrei ula shah rem noh.
Hynne ka sngi da ki spah ngut ki paidbah nongkyrshan jong u MLA ka Ranikor konstitwensi u bah Martin M Danggo ki la ialum ha bar ka ophis treikam ka BJP Shillong naka bynta ban shim iaka rai ban mih noh naka NPP.
Naka liang u nongialam ka BJP Meghalaya u Dipayan Chakraborty ula ong ba kane ka jingwan iasoh ki nongkyrshan ka NPP na Ranikor konstitwensi kan nang ai jingkyrmen ia u kyrtong ka BJP ban jop ha kane ka ilekshon ban wan.
U Dipayan Chakraborty ula iathuh ki don shibun ki daw ba pynlong ia u bah Danggo ban mih noh naka NPP bad ha ki sngi ban wan u bah Danggo un sa iasoh noh bad ka BJP naka bynta ban pynkhreh iaka ilekshon ban wan.
Haba kren bad kawei na ki nongialam jong ka NPP na Ranikor konstitwensi ka kong Pelcy Snaitang ka la ïathuh ba ka la don ka jingïakren bad u bah Danggo ba un pynïasoh noh bad ka BJP.
Ka kong Pelcy kala iathuh ruh ba la thikna ba yn pyndam noh iaka NPP Ranikor Unit namar baroh ki paidbah bad ki nongkyrshan u bah Danggo ki la mynjur ban pynïasoh noh bad ka BJP naka bynta ban iakhun ha kane ka ilekshon ban wan.
“Kum ki nongkyrshan, ngi la dawa iala u kyrtong (bah Danggo) ba un mih noh naka seng NPP mynta ka sngi hynrei namar ka jingsaphriang ki khubor ba la iasoh bad ka BJP kumta ngi kum ki nong kyrshan ngi la ialum hangne ban iasoh lang noh bad ka BJP” la ong ka kong Pelcy.
Ka kong Pelcy ka la ong ba ki katto katne ki nongialam ba rangbah ka NPP naduh u myntri rangbah ka jylla u Conrad K Sangma u badei ruh u National President ka NPP kila kyrpad ban ïashong ïapyrkhat bad ïapynbeit bad ban khroh biang ïa u bah Danggo ban ïakhun na ka party NPP.
Kala bynrap ba kum ki nongkyrshan kila shim iaka rai ban bud ia u bah Danggo haka jingleit iasoh noh bad ka BJP bad kin nang iatrei shitom ban pynjop ia u bah Danggo ha kane ka ilekshon ban wan.
