Shillong, Iaiong 18 : U President ka United Democratic Party (UDP) Bah Metbah Lyngdoh ula pyntip ba ula dep iakren bad u Myntri Rangbah ka Jylla Conrad K Sangma, halor ka State Reservation Policy bad ka Roster System haba ban jur ba ka jingiakren ka dei ban long na ka bynta ka bha ka miat jong baroh ki Jaidbynriew ba sah ha Meghalaya.
“Ha ka sngi ba u (CM) shong Ophis nyngkong, nga la iakynduh shimet ia u bad iakren bad u halor ka kam jongka Reservation Policy bad ka Roster System” ong u Bah Metbah haba iakren bad ki nongthoh khubor.
“Nga la wanrah hakhmat jong u ia kane ka mat ba jyrwit jyrwat bha kaba donkam ban iakren bniah naka bynta ka bha ka miat jong baroh ki Jaidbynriew ha Jylla bad ka sienjam ban shim ka dei ban long da ka lynti kaba jai jai bad ka jingsuk” ula bynrap.
Haba kylli, u Bah Metbah ula ong “Nyngkong eh, ka rynsan ba biang eh ka dei bad u Myntri Rangbah. Kane ka dei ka rynsan kaba dei. Ngi la pynsngew ia ka jingsngew jong ngi halor kaneka kam bad u Myntri Rangbah ula ai ia ka jubab kaba sngewtynnad ba ngin sa iakhmih bniah ia kane ka kam”.
Haba kylli halor ka nongrim jong ka UDP la ka jingpyntreikam ia ka Roster kan long nangne shakhmat ne naduh ki snem bas dang pyntreikam ia ka Reservation Policy, une u Nongialam ka UDP ula ong “Nga kwah ban ong ia phi hangne ba kane ka kam ka dei kaba jyrwit jyrwat bha. Uwei u lah ban ong nga kwah kumne nga kwah kumtai hynrei ngi don hangne na ka bynta ka bha ka miat ki paidbah ka Jylla. Da ka jingkitkhlieh, ngi hap ban pynthikna ba kano kano ka kam ba ngi shim ka dei ban long ha ka lynti kaba dei”.
Ula iai ban ba ka kam ka dei kaba jyrwit jyrwat bha bad donkam ban hap iakren bniah bad ki kynhun bapher bapher ha ka Sorkar bad ong “Ngin sa buh ia ki mat jong ngi bad ngin sa ai ia ki jingai jingmut halor kane ka kam”.
U Bah Metbah ula kyntait ruh ban kynthoh halor ka jingdawa jong ka VPP ban shong bishar thymmai ia ka State Reservation Policy bad ong “Ngam don jingsngew halor kane ka mat bala rah da kawei pat ka seng sain pyrthei. Nga don jingsngew tang iala ka jong ka seng sain pyrthei”.
Haba kdew ba ka UDP ruh kala kren shai ia ka jingdonkam ban bishar thymmai ia ka Reservation Policy ha ka mat ialap elekshon, u Bah Metbah ula ong “Kane ka dei kaba nga ong, ngin shong bishat thymmai ha kano ka lynti? Ha ka rynsan kaba dei. Kane ka dei kaba ngi hap ban sngewthuh”.
U Bah Metbah ula pynpaw ruh ba um don jingtip mano ba wanrah ia ka mat halor ka jingdonkam ban hot ia ka Dorbar Kyrpang ka Iingdorbar ban iakren halor ka Roster System bad ong ba kane ka kam ka donkam ban hap iatai shuwa ha ka rynsan kaba dei bad ngin sa iapeit nangne kumno ban leh.
