‘Ngi long kiba la pynkhreh ia ka elekshon MDC’
Shillong, Jylliew 26 : Ka United Democratic Party (UDP) kala pynpaw ia ka jingsngew ba ka Delimitation Committee ka dei ban pynkloi noh ha kaban aiti ia ka kaiphod ba pynbeit thymmai ia ki constituency ka KHADC khnang ba ka Sorkar kan lah ban khot pynlong noh ia ka elekshon MDC.
“Ka Delimitation Committee kala dei ban aiti noh ia ka kaiphod jong ka namar ka KHADC kala ai ia ka por kaba kylluid. Hynrei ka shong pat ha kane ka Committee la ka kloi ne em ban aiti noh” ong u Nongialam ka UDP bad Nongalam ka Liang Pyrshah ha KHADC Bah Titosstarwell Chyne.
Une u MDC ka Sohra ula pyntip ba ki Nongialam ka UDP kynthup ki MLA bad MDC kila iakynduh hynnin ka sngi ba-ar ban iakren halor ka elekshon MDC. U ong ba ka sur jong kiba bun hi ka long ba ia ka elekshon dei ban pynlong noh hadien ba kut ka jingpynjlan ba 6 bnai.
“Ka Sorkar Jylla kala pynjlan ia ka samoi treikam ka KHADC namar ka jingdon jong ka Delimitation Committee (kaba pynbeit thymmai ia u pud u sam jong ki constituency haba pynshong nongrim na ka jingdon ki Shnong bad u Paidbah). Ngi la aipor ia ka Committee ba kan pyndep ia ka kam hapoh ka por kaba la buh” ula ong.
Kat kum ka jingong jong u “Kumba long mynta hi, ka UDP ka long kiba kloi ban ialeh ia kane ka elekshon MDC ha kano kano ka por bad ngi da kwah ruh, ba ka dei ban long noh katkum ka por kaba la buh. Namar ban shu pynjlan shi pynjlan kumne, ka long beij ia ngi ruh kum ki MDC. Ka por kala dei ba ngin ia leit noh sha u paidbah bad ai ba u paidbah yn rai ia kaei kaba dei ban rai”.
Ha kajuh ka por ula kynthoh “Ka Delimitation Committee ka dei ban aiti ia ka kaiphod kaba biang, ka bym dei shuh ban nang iatai ne iania ne ban dang ia pynbeit shuh shuh ioh ka nang shimpor”.
Haba kylli ba bun ki MDC kila rai ban ym iakhun shuh iaka elekshon MDC hadien ba kila sakhi ia ka resol jong ka MP Elekshon kaba dang shen, u Bah TW Chyne ula ong, “Ia kata te ngan ym tip, namar ym pat don kiba pynpaw ha nga ia kata, hynrei na ka liang ka jong ngi baroh ki MDC ka UDP kiba mynta ngin dang iakhun bad ym don uwei ruh uban ong ban ym ialeh shuh”.
