Shillong, Jylliew 05: U Myntri ka tnad Pule Puthi Rakkam A Sangma hynne ka sngi Palei ula ong ba ka sorkar kan sa iaid shakhmat ban pynlong iaka jingiasyllok na ka bynta ban ‘Provincialisation’ ne shimti da ka sorkar ia ki Skul Deficit bad College kiba don ha kylleng jong ka jylla.
“Ka sorkar kan sa pynmih ia ka Meghalaya Education Grant (MEG). Ngi dang pynkhreh ban pynlong ia ka jingiasyllok bad ki bor kiba dei khmih jong ki jaka pule deficit namar ba ka sorkar ka dang pynkhreh ban shimti noh ne ban shim pyniaid ia ki baroh” la ong u Rakkam Sangma haba iakren bad ki nongthoh khubor.
Ula ong, ka jingthmu ka long ban pynbeit ryntih ia ka kam pule puthi haba bynrap “Ngi kwah ba ka don tang ha ki 3 tylli ki kyrdan jong ki Nonghikai lada bun eh kata, ‘Government’, ‘Non-Government’ bad ‘Private’”.
Katkum ka jingong ka jongu, kumba long mynta ka jylla ka don haduh 13 jait ki kyrdan jong ki nonghikai skul bad 4-5 jait ki kyrdan jong ki nonghikai College.
Haba kubur ia ki jingeh kiban sa mih, u Sangma ula ong, “Bun ki jaka pule kin ym pdiang bad bun ki jaka pule kin sngewkmen ba kin kylla noh kum ki jaka pule sorkar. Kumta, ngin sa don ia katei ka jingialang ban iasyllok ban tip la kitei ki jaka pule deficit kin ai ne kin ym ai ia ka jingmynjur ka jong ki”.
U Myntri Sorkar yn sa iakynduh lashai ka sngi ia ki nongmihkhmat ha Shillong ba niakren halor kane ka jingtyrwa jong ka sorkar.
“Ka jingtyrwa kaba nyngkong ka long ba ka sorkar ka dang pynkhreh ban shimti noh ne ban ‘provincialised’ ia baroh ki jaka pule deficit naduh na ki college shaduh ki skul primary namar ba kila don lypa ki ‘sanction posts’” la ong u Sangma haba bynrap, “Ka don ka jingeh namar ba ki bor pyniaid ne Governing Body jong kitei ki jaka pule ki lah ban ym mynjur bad kito ki bym mynjur ka rukom bhah tyngka kan sa pher noh bad na ka bynta kito kiba kloi ban ai ia ka jingmynjur, ka sorkar kan sa shim ia ka rai”.
Ula ong, ba ka sorkar kan donkam ban pynlut sa T.30-40 Klur na ka bynta ban provincialized ia baroh ki jaka pule kiba dei ki deficit.
Kat kum ka jingong ka jongu, kane kan iarap shibun ha kaban pynhiar noh ia ka jingshim ia ka bai pule kaba la shim da ki jaka pule deficit kumba ka long mynta.
Ula ai nuksa da kaba ong, “Ha Shillong college, ki don 71 tylli ki sanction post jong ka sorkar. Ka jingshim ia ka bai pule kumba long mynta ka long T.60,000 hynrei lada kane ka college kan kylla noh kum ka college sorkar, ka jingshim ia ka bai pule kan long noh tangT.15000.”
U Myntri ula pyntip ba ka sorkar kala pynlut kumba T.2000 Klur tang ha kaba iadei bad ka tulop jong ki nonghikai ha ka shi snem.
“Na kane, ngi la pynlut haduh T.927 Klur kum ka jingsiew iaka tulop sha palat 17289 tylli ki Deficit bad ki nonghikai Adhoc, T.366 Klur na ka bynta ki 14,666 ngut ki nonghikai SSA bad T.216 Klur na ka bynta ki 1399 ngut ki nonghikai college bad kiwei kiwei” ula ong.
