Shillong, K’lyngkot 28 : Ka Hynniewtrep Youth Council (HYC) kala dawa ia ka Sorkar Jylla ban tei ia ka Cultural Centre ba kyrpang ha Khyndailad, Shillong, ban pynneh pynsah ia ka kyrteng ba sah khana bad ka pateng jong kane ka jaka.
Ha ka shithi sha u Myntri Rangbah Conrad K Sangma bad Symbud Myntri Rangbah ba khmih ia ka Tnad Urban Affairs Bah Sniawbhalang Dhar ha ka sngi Balang, u President ka HYC Bah Roy Kupar Synrem ula ong “ Ka Khyndailad ka donhok ban sah jingkynmaw ym ka kyrteng ban klet noh, hynrei kum ka dak baim jong ka pateng u Khasi hapdeng eh ka Shillong….ngi kyrpad jur ia u Myntri Rangbah ba Symbud Myntri Rangbah ba khmih ia a Tnad Urban Affairs, ba kin mynjur lang ia kane ka jingdawa bad bthah ia ki tnad ba dei khmih ba kin pynlong ia ka jingwadbniah bad sdang ia ka project ha ryngkat ka jingiasyllok bad ki Dorbar Shnong lem bad ki seng bapher bapher”.
“Kane ka Centre kan ai bun ki jingshakri, kynthup ka jingpynneh pynsah ia ka jinglong tynrai, ban kyntiew ia ki artist trai shnong, ka sengkam sengjam bad ka jngohkai pyrthei kaba neh” ula bynrap.
Ka Centre kan don ia ki jaka madan ban pynlong ia ki tamasa pynbyrngia, ki dukan na ka bynta ki jingbam tynrai bad tiar shna hi, bad ki jingwah ia ki jingthoh kiba batai ia ka khana pateng jong ka Khyndailad.
Ka HYC ka ngeit ba kane ka sienjam kan ai burom ia ka mynnor, ka thaw ia ki lad kamai jakpoh, bad pynrung ia ka jingsngew sarong hapdeng ki paidbah.
 kala dawa ia ka Sorkar Jylla ban tei ia ka Cultural Centre ba kyrpang ha Khyndailad, Shillong, ban pynneh pynsah ia ka kyrteng ba sah khana bad ka pateng jong kane ka jaka.){kind=link}