Shillong, Naiwieng 16: Ka Shillong Cherry Blossom Music & Arts Festival 2025 kala kut noh ha ka miet jong ka sngi Saitjain da ka jingshongkun, kaba la pynskhem ia ka kyrdan jong ka jylla Meghalaya kum kawei na ki nongialam hapoh ka ri India ha ka ioh ka kot lyngba ka tamasa.
Ha kine ki ar sngi jong ka tamasa, kala don ka jingpynbyrngia na ki nongrwai bad ki kynhun tem kiba nabar bad la pyni ia ka sap ka phong da ki nongrwai bad kynhun tem napoh ka jylla kaba la pyninam ruh ia ka jingriewspah ka kolshor, kaba la kyntiew ruh ia ka kamai kajih lyngba ka kam jngohkai bad ka jingkiew ka ioh ka kot.
Da ki hajar ngut ki paitbah kila iatuid sha ka Jawaharlal Nehru Stadium bad ka Cultural Arena kiba la don ha kylleng ka Shillong, kaba kane ka tamasa sa shisien kala pynshisha ba ka Meghalaya ia ka jinglah ban pynlong ia ki tamasa bad Concert kaba heh hapoh ka ri.
Kane ka tamasa kala sdang da ka jingplie u Myntri Rangbah ka jylla u Conrad K. Sangma uba la pynpaw ia ka jingiohi jngai ka sorkar ban pynlong ia ka
Cherry Blossom Festival kaba kynthup ia ki kolshor kiba pura.
Ha ka por janmiet, kane ka tamasa kala don ia ka jingpynisap bad ka jingpynbyrngia na ka nongak phlim Bollywood bapawnam ka Nora Fatehi bad la nang pynshongshit shuh shuh ia ki paidbah da ka kynhun tem kaba pawnam ha ka pyrthei ‘The Script’, ia kaba ki paitbah kila iarwai lang da ka jingkmen ia ka jingrwai “Hall of Fame”. La pynkut ia kane ka tamasa ha ka miet kaba nyngkong da u nongrwai Pop bapawnam u Jason Derulo, uba la rwai ia ka jingrwai “Swalla” bad “Savage Love,” ha kaba kane ka stadium kala saw jam ia ki sur jingrwai bad ka jingmeh jingthaba jongki jingdengkti ne LED Wristbands.
Haba phai pat sha ka Japan Arena kaba don ha Ward’s Lake kala plie lad ia ki nongwankai ba kin sakhi ia ka kolshor ba kyrpang, ki jingpyninam ki bapher bapher, ki jingdro bad kiwei kiwei.
Ha ka sngi ka baar, ia ka tamasa la sdang da ka nongrwai ba pawnam ka jylla ka Meba Ofilia bad hadien kane kala don ka jingpyninam bad jingpynsngewtynnad na ka Japan’s Drum Tao bad DJ Kennedy. Hadien kane kala don ruh ka jingrwai kyrpang kum shi bynta ban kynmaw burom ia u nongrwai ba pawnam ka ri u Zubeen Garg ha kaba bun na ki nongpeitkai kila ia rwai lang ia ka jingrwai ‘Mayabini’, ia kaba la wan ban rwai da u Zublee Baruah, Prabin Borah, Priyanka Bharali bad Arupjyoti Baruah.
Ki paitbah kila sdang ban shongshit bha, haba ka kynhun tem kaba pawnam ka Aqua kala pynbyrngia bad pynlong ia ki paidbah ban shad ia ka jingrwai kaba pawnam ka jongka “Barbie Girl,” katba u nongrwai hip-hop u Tyga ula pynshongshit ia ki paitbah da ka jingrwai “Swish,” “Dip,” bad “Ayy Ladies.”
La pynkut pat ia kane ka jingiatem iaput da u Diplo, uba la ioh khur laisien ia ka khusnam Grammy uba la pynkylla ia kane ka madan kum ka jaka shad lyngba ki jingtem DJ ka jongu bad kala don ruh ka jingtem DJ na u DJ Zethan bad Arius kaba la pynthikna ba ki paitbah kin shongshit ha kane ka miet.
Nalor ka rynsan jong ka tem ka put, kala don ruh ka jingpynsngewtynand ia ki paitbah da ka jingpyninam ia ka Cosplay, ka jingbuh ia ki dukan bam ki bapher bapher, ki jingthain kti bad kiwei kiwei kum ka jingpyninam ia ka jingriewspah ka kolshor ka jylla. Ki kynhun kiba la ioh iashimbynta ha ka tamasa kidei ruh kiba la ioh ban pyni ia ka sap ka phong ka jongki lyngba ka jingkyrshan kaba kila ioh na ka CM Meghalaya Grassroots Music Project (MGMP).
Ka Shillong Cherry Blossom Festival kala kylla long ka tamasa kaba heh kaba la khring ia ki nongrwai kiba pawnam na kylleng ki ri kum u Akon, Clean Bandit, Boney M, Ne-Yo bad mynta ia u Diplo, Tyga, Aqua bad Jason Derulo.
Da ka jingiohlad ruh jongki trai jylla ban pyni iala ka sap ka phong ryngkat lang bad ki nongrwai kiba na kylleng ki ri, kane ka tamasa kam dei satia tang ka tamasa jong ka tem ka put hynrei kala kyntiew ruh ia ka ioh ka kot ka jylla lyngba ka kam jngohkai pyrthei, kaba plie lad ban aikam aijam bad ban buh ia ka Meghalaya ha ka kyrdan kum ka jaka pdeng kaba biang tam kaba don ruh ia ka kyrdan ha ka pyrthei ban iohmad ia ka kolshor.
