Nongpoh, Risaw 22: Ka Lympung iakhun niah kali AHOR 4X4 Off-Road ka la poi noh sha kaba kut hadien ka jingiakhun niah kali ha ki lynti kiba khohruh khohram kumba 3 sngi lynter.
Ha kane ka lympung la wan ban ia shimbynta da ki nongniah kali shynrang bad kynthei kiba tbit na kylleng ka thain Lam Shatei Mihngi kynthup napoh ka jylla Meghalaya. Ia kane ka lympung la pynhap pyrda noh hapoh ka Kharsati Park, Ri Bhoi District.
Ia kane ka lympung niah kali ha ki lynti kiba khohruh khohram la pyniaid da ka kynhun jong ka Adventurous Hynniewtrep Off Roaders, ha kaba la phiah ia ki jingiakhun ha ki katto katne ki kyrdan ban kynthup naduh ka SS-I, SS-II, SS-III, SS-IV bad SS-V, kynthup ka jingiakop niah kali ha ka por mynmiet.
La pynhap pyrda ia kane ka lympung da u Bah MB Tongper, Additional Deputy Commissioner ka Ri Bhoi District ha ka jingiadonlang ruh u Bah William Hek, Symbut Kongsan, u Bah Damian Umdor, President ka AHOR, u Bah Ferdynald K Kharkamni, Vice President ka AHOR nalor kiwei kiwei.
Haba ai jingkren, u Bah MB Tongper, u la pynpaw ia ka jingkmen ban ioh wan sakhi dalade ia ki rukom niah kali kiba ishyrkhei bha ha kaba ki nongiashimbynta ki la pyni ia la ki sap niah kali kiba tbit. Ula ong ba kane ka rynsan kan nang plielad ia ki nongniah kali donsap ban nang pyntbit ialade ban ioh ban ia shimbynta sha ki lympung iakhun niah kali ha kylleng ka ri India bad kiba shabar ri ruh.
Kum u kongsan, u la kitbok kitrwiang ia baroh ki nongiashimbynta kiba la wan ban shimbynta ha kane ka lympung khamtam ia ki nongjop ba kin nang lah ban kiew shuh shuh ha ki sap jong ki bad ruh da ka kyntu pat, ba ka jingniah kali ha ki jingiakop kin kut noh tang ha ki jingiakop hynrei ym ban bud tynneng ia kum kine ki rukom niah kali ha ki surok bah ban lait na ki jingjia kiba sngewsih.
Na ka liang ka AHOR ka la ioh ban sam ia ki khusnam ha ryngkat ka song pisa sha baroh ki nongjop ha ki kyrdan iakhun niah kali bapher bapher.
