Shillong, Lber 06: U National President ka National People’s Party (NPP) u ban sa bam smai biang kum u Myntri Rangbah ka Jylla Conrad K Sangma hynne ka sngi nyngkong, ula ong ba ka Party kala kut jingmut ban pyntreikam iaka Inner Line permit (ILP) hapoh Meghalaya bad ban buddien ia ka kam ban pynbeit noh ia ka jingiakajia pud bad ka Assam.
“Hooid ka thong kadei hi ban pynbeit noh ia u pud u sam jong ka jylla hapoh kane san snem” la ong u Conrad.
U Conrad ula ong ba ka sorkar jylla bad naka liang ka Party kan shim khia ban iakren bad ka sorkar pdeng halor ka jingdawa ILP, ban pynrung iaka ktien Khasi bad Garo hapoh ka khyrnit ba phra ka riti synshar ka ri India.
“Kine ki mat kidei kiba ha khmat eh jong kane ka sorkar ban wan bad ka party” ula ong.
Haba pynshai iaki mat bad ka thong ba ka sorkar ka don, u Conrad ula ong ba kane ka sorkar kan ialeh ban thaw kam naka bynta ki samla ha kine ki san snem ban wan.
“La kadei hapoh ka tnat IT sector, hapoh ki san snem bala dep ka sorkar ka la lah ban thaw kam haduh 3,000 hapoh ki Call Centre bad BPO IT Park bad ka thong naka bynta ki san snem ban wan kadei ban thaw kam palat 20,000 bad haduh 5,000 tylli ki kam ka sorkar kala dep mang tyngka” la ong u Conrad.
U Conrad ula ong ba ka sorkar kan kyntiew iaka lad ioh kam hapoh ka tnat jngohkai pyrthei hapoh kane ka jylla namar ka Meghalaya kadei kawei na ki jylla hapoh India kaba paw bha namar ka jingitynnad ka mei mariang.
“Ka sorkar ka sngew ruh ba ka tnat ka rep ka riang kadei kawei ka lad ban kyntiew iaka ioh kam ioh jam bad nalor kine ka sorkar kan kyntiew ruh iaki lad ioh kam haba iadei bad ka tnat ka koit ka khiah bad ka pule puthi bad nalor kiwei kiwei de kum hapoh ka tnat Social Sector” ula ong.
Ula ong ba ka sorkar synroplang MDA-I ha ki san snem bala dep kala kyntiew bha haba iadei bad ka jingpynioh surok ha baroh kawei ka jylla.
“Nga kyrmen ba ha ki san snem ban wan baroh ki longïng kin ioh um bam um dih, ki surok, ki bording bad naka liang ka sorkar kan sa pynkhreh bha ia lynti iaid ban pynurlong ia kine baroh” ula ong.
Haba kylli halor ki jingshah kynnoh bamsap, naka liang u Conrad ula ong ba ka kyntien bamsap kadei bala pynmih da kito kiba pyrshah iaka sorkar jylla.
“Ki jingkynnoh ki mih hynrei iaka kyntien bamsap la pynmih da kito kiba pyrshah iaka sorkar hynrei naka liang ka sorkar MDA kam don eiei ban buhrieh bad ia kiei kiei kiba ka Liangpyrshah kala dawa, naka liang ka sorkar kala pynurlong” ula ong.
