Pynbna u CM ban tei noh ia ka Ophis u DC ha EWKH
Shillong, Naitung 17 : U Myntri Rangbah ka Jylla Conrad K Sangma ha ka sngi Nyngkong ula ong ba ka Sorkar Jylla kala kut jingmut bann tyngkai ia ki jaka sah khana bad ki jaka sah nam jong ka Jylla Meghalaya.
Haba kren ha ka jingialang ba long ha Mairang ban kynmaw burom ia ka sngi iap ba 188 snem u Tirot Sing Syiem, u Conrad ula ong “ Ka dei ka burom ban sngewnguh ban iadonlang mynta ka sngi haba ngi rakhe ia ka sngi iap u Tirot Sing, u khla wait ba shisha. U Tirot Sing u dei u Nongiakhun laitluid ba janai bad ruh ka dak ba pyni ia ka mynsiem ba shynrang ban iakhun pyrshah ia ka jingsynshar ka Bilat. Nga kyntu ia ki samla pule bad ki samla ba don hapdeng jong ngi ban shim ia ka sap long Nongialam bad ban pynsahnam ia une u nongialam jong ngi”.
Ula ong “Ka Sorkar Meghalaya ka ngeit b aka long kaba kongsan bha ban buh jingthoh ia ka jingim bad ki jingialeh jong ki riewkhraw ka Jylla da kaba pyndonkam ia ka sap jong ki samla. Ka Sorkar ka kyrshan ia ka jingpyrshang jong ka Khasi Hills Autonomous District Council bad kiwei ki District Council ba kin buh jingthoh bad pynmih ia ki biography jong ki Nongialam jong ngi”.
“Nga sngewbha eh ban pyntip sha phi ba ka Sorkar kala kut jingmut sha ka roi ka par jong ki kynhun ki samla lyngba ka YESS bad ka Meghalaya Grassroot Music Project, kaba hadien habud kan kynthup ia ki jingialehkai theatre” ula ong.
U Conrad ula pynbna ruh ba ka Sorkar kan sa shna noh ia ka Ophis ba pura jong u Deputy Commissioner ka Eastern West Khasi Hills bad kumjuh ruh ia ka Convention Centre, Auditorium, Madan ialehkai, ki movie theatre ha Mairang.
U Bah Phrestar Manik Syiemlieh, Chairman ka Syiem Hima Nongkhlaw, ula ong, “Ngi da sngewnguh eh ban don bad ngi ia u Nongialam jong ngi, Conrad K Sangma ha kum kane ka sngi ba khraw. Ka jingkyrshan jong u ka nang ai bor ia ka jing kut jingmut jong ngi ban pynneh pynsah ia ka nam jong u Tirot Sing bad ban trei na ka bynta ka lawei ha kaba ka hok bad ka jinglaitluid kan ieng rasong. Ha ryngkat lang, toh ngin nang aibor ia ki briew jong ngi bad ban tei ia ka imlang sahlang kaba don ka mynsiem ba shlur, ba iatylli bad ba kiew shaphrang”.
Ha kajuh ka por, u Myntri Rangbah ula leit ruh ban iuhkjat ha Nongkhlaw, ka jaka ba kha ia u Tirot Sing ha Eastern West Khasi Hills bad ioh iakren bad ki nongkitkam ka Hima.
Ia kane ka sngi khraw la pyniphuh iphieng da ki jingrwai nala tynrai, ki jingshad bad ki jingialehkai drama. Ia kane ka jing ialang kynmaw burom la pynlong da ka Ophis u Syiem ka Hima Nongkhlaw da ka jingiarap lang ka Sorkar Jylla.
Pule ruh: Pynjynsur ka MeECL ia ka jingpynlip bording satang 2 kynta ha Shillong, Jowai bad Tura
