Shillong Nailur 09: U Myntri ka tnad Social Welfare Bah Paul Lyngdoh ha ka sngi Baar, ula ong ba ka sorkar kala iakhun pyrshah ia ka jingkynrei u droks da ka borbah bad ka iengskhem ha ka ban rat dyngkhong ia ka.
“Ngi lah shim ia ka lynti da ka borbah, ngi lah shimkhia ban iakhun ban tehlakam, ban pyrkhing bad nga ngeit skhem ngin sa lah ban pynduhjait pura ia une u jingdih” ong u Bah Paul Lyngdoh haba jubab ia ka Special Motion kaba la wanrah ha ka iingdorbar da u MLA ka VPP na Nongkrem bad u MLA ka North Shillong halor ka jingma jong ka jingkiew ki nongdih droks bad ki briew kiba don ia ka jingpang HIV ha ka jylla bad ka jing ktah iaka imlang sahlang.
U Bah Paul ula pyntip ba hapoh kine ki 10 sngi bala leit, ki jingdih pynbuaid ba shongdor T. 4 Klur la ioh ban kurup na ri-lum Jaintia bad T.1 Klur na Shillong.
Haba kdew ia ka jingialang kaba la lum da u Symbud Myntri Rangbah Bah Prestone Tynsong ha u Naitung ban iakren halor kane ka mat, u Myntri ula pynpaw ba dei tang u Bah Nongrum uba la wan poi sha ka jingialang na ka VPP.
“Nga kwah ban da kdew kyrpang ia ka jingdonlang jong u Bah Adelbert Nongrum ha katei ka jingialang. Nga kwah ban iadonlang ha kane ka jingdonlang u nongwanrah ia ka motion bad u dkhot na Mawlai bad Mawrynkneng constituency kaba kane ka jingeh kala kylla long kaba jur bha” ula ong.
Ula pynshai shaphang ki sienjam kiba kongsan ban iakhun ia ka jingkharoi ki jingdih pynbuaid, u Bah Paul ula pyntip ba hadien 25 snem ba la mynjur ia ka PITNDPS ha Parliament ha u snem 1988, ka sorkar Meghalaya kala pynkylla thymmai ia ki kyndon jong ka Aiñ bad ban pyntreikam hapoh Meghalaya.
“Mynta katba ngi dang kren, kila don 5 ngut kiba ju mlien ban pynkheiñ ia ka aiñ, kila don hapoh ka jingshah set phatok ha ka jylla Meghalaya,” ula ong haba bynrap, “Nga kwah ban kdew ia katei ka bynta jong ka ain, ka Prevention of Money Laundering Act bad ban kdew thik ia ka kyndon kaba kynthup ia ka PITNDPS Act, kaba plie lad ia ka jingdon jingem jong kiba shah bat, ka jingdon jingem jong ki bahaiing bahasem, ki bahaiing kiba iajan bha bad uba shah kem bad ka jingkurup ia ka Bank Account ym tang jong uba shah kem hynrei wat ia ki bahaiing ba iajan eh”.
Ula pyntip ba ka sorkar kala thaw ia ka Anti-Narcotics Task Force (ANTF) Police Station kaba kyrpang ban tohkit ia ki case jong ka NDPS bad PITNDPS.
La thaw ia ki 12 tylli ki ANTF Unit hapoh ka jingkhmih jong ki Superintendents of Police ban pynthikna ban don ka jingshim khia bad jingpynshitom pyrshah ia ka jingkhaii droks.
Ha kine ki 5 snem kiba la dep, u Bah Paul Lyngdoh ula ong ba kila don 603 tylli ki case NDPS la dep rejistar, bad 1069 ngut kila shah kem bad bun bah u jingdih pynbuaid la ioh ban kurup.
“Ka tnad Pulit kala buh hakhmat ban pynkloi ia ki kam kiba iadei bad ka jingkurup droks. Ha ka 23 tarik u Kyllalyngkot, ia ki jingdih pynbuaid na ki 56 tylli ki case la pynduh bad pynjulor noh hapoh ka Incenerator jong ka Star Cement kaba don ha Lumshnong kaba kynthup ruh ia u cannabis, crystal meths bad ki dawai jyrhoh” ula bynrap.
Nalor kane, ula iathuh ba ka sorkar kala banjur ruh ia ka jingkongsan ban ai jaka sumar ha ki Rehab bad ka jingpynsngewthuh paidbah ha kaban iakhun ia ki jingkynrei ki jingdih kiba sniew.
Kila don 12 tylli ki Rehabilitation Center kiba la don lypa hapoh ka jylla, kynthup ia kawei ka Integrated Rehabilitation Center na ka bynta kiba la ngop kaba don ha Mawdiangdiang, kaba la kyrshan da ka Ministry of Social Justice and Empowerment.
Ka sorkar kala iatreilang bad ki tnad bapher bad ki NGO ne sengbhalang ban pynsngewthuh paidbah halor ka jingktah jong ki jingdih kiba sinew bad ka jingpanag HIV/AIDS.
Kila don 62 tylli ki NGO kiba la ioh ia ka jingiarap ban pyniaid shakhmat ia ka jingialap pyrshah droks, ia kaba kila lah ban pynpoi sha ki 15,639 ngut ki riewshimet.
Ka sorkar kala iasoi iaka MoU bad ka Society for Promotion of Youth and Masses ban ai jinghikai pyntbit ia ki nonghikai kum ki Master Trainers kaban pyntreikam da ka tnad pule puthi.
