Shillong, Nailur 10 : Ka Sorkar Jylla kala pynlut palat T.2.93 klur kum ka jingsiew ia ka bainong sha ki 34 ngut ki muktiar Sorkar ba la buh ban iakhun ia ki mukotduma ha Iingkashari Supreme Court ha u snem bala lah.
Ki don haduh 243 tylli ki mukotduma ba dang sahteng ha Iingkashari Supreme Court ha kaba ka Jylla ka dei ka liang mamla.
Ha ka jubab bala wanrah ha Iingdorbar Thaw Ain ha ka sngi Ba-ar, ka Myntri ba khmih ia ka Tnad Ain Kong Ampareen Lyngdoh kala ong ba 34 ngut ki muktiar Sorkar la buh ban iakhun ia ki mukotduma na ka bynta ka Jylla Meghalaya ha Iingkashari Supreme Court.
Na kine, 6 ngut ki dei ki muktiar trai shnong kiba don ha ka thup ba mihkhmat sha Iingkashari Supreme Court.
Ka ong ba haduh mynta, ka jingsiew ia ka bainong sha u Advocate General bad ki muktiar Sorkar ha Iingkashari Supreme Court la leh kat kum ka jingpynbna bala pynmih ha ka 11 tarik Risaw, 2018 bad 7 tarik Rymphang 2019.
“Ka jingsiew baroh lang ia ka bainong bad kiwei kiwei ki jingsiew ba dei hok ban ioh da u Advocate General bad ki muktiar bala buh da ka Sorkar Jylla ha Iingkashari Supreme Court na ka bynta u snem 2024-25 ka long T. 2,93,12,350” bynrap ka kong Ampareen.
