Shillong Rymphang 26: Ka Sorkar Jylla kala pynpaw ia ka jingsngewkhia halor ka jingjur palat ka jingpluh Iing namar ka jingthut ki waiar bording elektrik bad kut jingmut ba kan leh eiei noh khnang ban lah tehlakam.
Ia kane la pynpaw da u Myntri ka tnad Bording Abu Taher Mondal hynne ka sngi Nyngkong haba bynrap ba kam long ka ba suk ia ka Tnad ban leit jngoh ia ki lain bording ha man ki thliew iing namar ki waiar bording ki iaid hapoh Iing.
Hynrei, ula ong ba ka Tnad ka don jingthmu ban leh noh da ka audit ia ki waiar bording jong ki Iingdieng bala rim bha, kiba don ha nongbah Shillong.
Ula pan ia ka jingiatreilang jong ki paidbah ba kin pyntip ia ki jingsngewkhia ba ki don haba iadei bad ki lain bording sha ka Tnad.
Ula kyntu ruh ia ki paidbah ba kin phiir bha bad ban nym ailad ia ka over loading ha ki iing ki sem jong ki.
“Lada don kaei kaei ba iadei bad ka bording, ka Corporation kan pynbeit mar mar ia ki khlem kano kano ka jingeh” ula bynrap.
Haba kylli ia ki post elektrik ba sarang bad ki waiar ba iatakhuh bala sakhi ha kylleng ki jaka jong ka Nongbah, ula ong ba ka Corporation kan sa bujli noh mardor ia kine ki post elektrik haba don kano kano ka jingujor.
Lah ban kdew hangne ba ka Iingdieng ba palat 111 snem jong ka Shillong Bar Association kala kylla dpei na ka jingbam duh ki thylliej ding, ia kaba la suba jur ba dei na ka jingthut jong ki waiar bording.
