Shillong, Jymmang 20: Ka Myntri ka Koit ka Khiah Kong Ampareen Lyngdoh kala pyntip ba ka Sorkar Jylla ka la kut jingmut ban pynthikna ha kaban ai ia ka jingshakri kaba bha tam ha ka koit ka khiah ia ki paidbah ka Jylla.
Ka Kong Ampareen kala pynpaw ia kane haba plie paidbah ia ka Lawbah Primary Health Centre (PHC) hynne ka sngi Saitjain, ha ka jingiadon lang u MLA ka Mawsynram Bah Ollan Singh Suin, ka Deputy Commissioner ka East Khasi Hills Bah RM Kurbah bad ki Ophisar ka Tnad ka Koit ka Khiah.
Haba kren ha ka jingialang, ka Kong Ampareen kala ong ba ka Sorkar Jylla kala kut jingmut ban pynthikna ha ka ban ai ia ka jingshakri kaba bha tam ha ka koit ka khoah ia ki paidbah ka Jylla bad kane ka PHC kan dei ka jing pyni ia ka sienjam bala shim da ka Sorkar ban ai ia ki lad jingsumar ba kumjuh sha baroh ki paidbah la ki dei kiba ha sor ne ha Nongkyndong ruh kumjuh.
Ka Kong Ampareen kala ai khublei ia baroh ki kynhun kiba iadonbynta ha kaban pynurlong ia kane ka jingphoh sniew jong ki paidbah ka Lawbah bad ki jaka ba amrjan.
Kala kyntu ia ki ban nang trei shitom bad ban bat ia ka mynsiem ban iatreilang kum ka kynhun khnang ban lah ai ia ka jingshakri kaba biang tam sha u paidbah. Kala kyntu ruh ia ki paidbah ban iatreilang ryngkat ryngkat bad ka Tnad bad ruh ban sumar bha ia ka jingtei (PHC) bad ki sawdong jong ka.
Ka Myntri kala kular ruh ia ki paidbah ba ka Sorkar kan ai ia baroh ki jingkyrshan ba iadei bad ka jingdonkam briew, ki tiar sumar bad ki jaka sah ia ki Nongtrei ba kane ka PHC kan treikam bha.
Kala ai khublei ruh ia ka Special Purpose Vehicle Society bala wanrah da ka Lafarge Umiam Mining Private Limited (LUMPL) halor ka jingthied ia ki machine bapher bapher bad ki tiar ki tar ba pyndonkam ha kane ka PHC ka ban nang iarap ia ka jingshakri jong kane ka jaka sumar.
Lah ban kdew ba kane ka PHC ka dei kaba la shna ha ka jinglut ba kot T. 4.19 klur.
