Guwahati, K’lyngkot 23 :Ha ka jingpynlong ia ka jingkhynra kaba kyndit kyndit, ki bor shipai na ka tnat 18th Garhwal Rifles, Deomali camp ryngkat ka jingiarap ki bor sorkar ka Deomali, ki la ioh ban kurup ia bun tylli ki trok kiba kit beain ia ki dieng nalor ka jingot dieng na ka lynti surok Namsang-Hukanjuri kaba hapoh Arunachal Pradesh.
Ha katei ka jingkhynra na ki phra tylli ki trok la ioh ban kurup haduh 62 tylli ki dieng ha kane ka miet sngi Saitjain ba la lah.Kiba bun na kine ki dieng ba la ioh kurup ki dei ki dieng Hallong.Ia kine ki dieng ba la ioh kurup la aiti noh sha u DFO ka Deomali.
“Kine ki trok ki dang don ha ka lynti ban leit shaRangla kaba hajan Deomali kata shapoh ki karkhana dieng.Kiba bun na kine ki dieng ba la pom beain da ki nongkhaii beain ki dei na ki bynta jong ka Huguri kaba hap hapoh Joypur range jong ka Dibrugarh Forest Division.Katto katne ki riew ieit mariang na ka thain ki la iohi ia kine ki trok ia kiba la buhrieh ha ki jaka khlaw jong ka Huguri naduh kine ki 10-12 sngi ba la dep bad pyntip noh sha ka tnat forest, hynrei kim shym la shim ia kino kino ki sienjam,” ong ka tyllong khubor.
“Man ka sngi shibun bah ki trai ki ju kit beain ia ki dieng bad iaid lyngba katei ka surok, hynrei wat hadien ba kila ioh jingtip hynrei ka tnat Forest ka la shu long tang kum ka nong peitkai.Mynta, ia kane ka kam jong ka tnat forest la hap ban shimti da ka tnat shipai.Katto katne ki heh sorkar bamsap na ka tnat forest napoh Assam bad Arunachal Pradesh ki la don ia ka jingiasngewthuh jingmut lang bad ki nongkhaii dieng beain, bad man u bnai ki ju ioh pdiang ia shibun bah ka pisa na ki,” kyllong ka tyllong khubor
