Shillong, Lber 14 : Ki Pulit ka East Jaintia Hills hynne ka step sngi ba-ar, kila ioh kem ia arngut ki briew kiba dei ki nongkhaii ganja bad ioh kurup ruh ia une u jingdih buaid uba khia palat 71 kilo.
Kine ki arngut ki nongkhaii ki dei kiba la ithuh kum u Babalu Singh (56) ba na Kale Diara, Patna bad u Saranjan Mahto (39) na Bihar, ong u Superintendent of Police ka District Jagpal Singh Dhanoa.
U pyntip ba ka kynhun ANTF bad ki Pulit ka Anti Infiltration ha Umtyra CP, kila pynap shrip halor ka jingioh khubor ba kin don arngut ki nongkhaii droks ki ban wan rung da kawei ka maruti sx4 (AS01-AN-3312) ryngkat ki jingdih buaid na ka thain Kalain sha Khliehriat.
Ia kane ka kali la ioh ban bat katba ka dang wan na Lumshnong ha ka por 6.15 baje mynstep bad ha ka jingtalasi, la ioh ban kurup haduh 117 song u jingdih buaid bala buhrieh ha khrum jong ka kali.
Ha ka jingtohkit la lap ba une u jingdih u dei u ganja bad u khoa haduh 71.476 kilo, ong u SP uba iathuh ba ki Pulit kila register case pyrshah ia kine ki arngut hapoh ka NDPS Act ha Khliehriat Police Station bad ka jingtohkit mynta kala iaid shakhmat ban lapdien ia ki jaka ba u mih bad ki nongthied.
