Shillong, Nohprah 01: U Inspector General (IG) ki shipai Border Security Force (BSF) u Inderjit Singh Rana hynne ka sngi palei, u la iathuh ba ki shipai iada khappud ka Ri, haduh mynta kila ioh ban kurup ia ki mar khaii beain ba kot haduh T. 25 klur na kylleng ki thain khappud ka Meghalaya bad ka ri Bangladesh.
Une u heh shipai BSF u la pyntip ia kane hadien ka jingrakhe iaka ’58th Raising Day’ jong ki shipai BSF kaba long ha ktem shipai BSF, ha Umpling Shillong.
Haba kren sha ki lad pathai khubor u Inderjit Singh Rana u la ba ki shipai BSF ha kine ki khyndiat bnai ba la dep kila pynlong ka jingpahara kaba jur ha ki thain khappud ka jylla bad kila ioh kurup kum ki jait drok, ksiar, ki mrad, bad kiwei kiwei de ki mar ba thmu shalan beain sha Bangladeshi.
U Inderjit u la iathuh ba naduh u bnai Kyllalyngkot haduh Naiwieng 2022, ki shipai BSF kila kurup haduh 3088 kiba shongdor T. 4.91 klur, haduh 9448 tylli ki bilor dih buaid ba shongdor T. 12.47 lak, 7471 ki bilor Phensedyl ba shongdor T. 15.04 lak, ki Hemp bad Ganja ba shongdor T. 3.80 lak, ki Yaba Tablets T. 51.90 lak bad kiwei kiwei ki mar khaii beain ba shongdor T. 19.41 klur.
Nalor kane u heh shipai BSF u la iathuh ba ki shipai kila kurup ruh ki pisa thok ba shondor T. 87,500 ka pisa India.
U IG ki shipai BSF u Inderjit Singh Rana u la iathuh ba ki shipai kila ioh kem haduh 123 ki briew na ki thain khappud ba kynthup 30 ngut ki Rohingya, 32 ngut ki nong Bangladesh bad 61 ngut ki India.
