Shillong, Jylliew 26: Ki shipai Border Security Force (BSF) hynne ka sngi U Blei, kila ioh kurup ia bun bah ki dawai, ki jingtah khmat ban pynbhabriew jong ki Kynthei lem bad ki jain ki nep kiba shong dor haduh T.20 lak.
Ia kine ki tiar la ioh ban kurup da ka jingapshrip ha ki katto katne ki jaka khappud jong ka West Jaintia Hills hadien ka jingioh khubor ba don ki nongkhaii kiba thmu khaii tuh ia kine ki mar sha Bangladesh.
Ki shipai BSF haba ioh ia kane ka jingtip, mar mar kila pynkhreh ia ka jingkynra bad kila ioh ban khanglad ia ka jingkhaii tuh. Ki tiar bala ioh kurup ki kynthup ia ki dawai Ista20, Cap Mon Q, Oint Drone TM, Oint Cesol, Syrup VB3 bad kiwei kiwei kiba shongdor haduh T.10 lak 90 hajar.
Ha kawei pat ka jingjia, ki shipai BSF kila ioh ban kurup ia bun bah ki jingtah durkhmat ki kynthei bad ki jain ki nep na khappud ka East Khasi Hills bad South West Khasi Hills kiba shongdor kumba T. 9 lak.
Ki shipai kila ioh kem ia uwei u nong Bangladesh ba kyrteng u Feroz Ali ban a Sylhet katba u dang rah ia kine ki jingtah durkhmat ha ki thain Pyrdiwah, kaba hap hapoh ka Pynursla Police Station.
