Shillong, Jylliew 14: Ki Pulit ka Anti Narcotics Task Force (ANTF) hynnin ka sngi nyngong, kila ioh ban kurup ia u ganja ba khia palat 1000 kilo na ka thaiñ Tyrsad bad kem ruh ia kawei ka briew kaba suba jur ba ka dei ka nongkhaii ia une u ganja.
Kat kum ka jingiathuh u Superintendent of Police ka East Khasi Hills Bah Silvester Nongtnger, kane ka jingioh kurup ia u ganja kala jia na ka jingpluh jong kawei ka iing kaba don ha Tyrsad, kaba jia hynnin ka step por 8:30 baje.
Une u Heh Pulit u pyntip ba ki Pulit ka Fire & Emergency kila leit sha Tyrsad ban pynlip ia ka ding kaba pluh ha kawei ka Iing ha ka jingiadon lang kiPulit ka Mawngap Police Station. Hynrei u ong ba ha ka jingtohkit, ki Pulit kila lap pynban ia ka khrum jong kane ka Iing bala pyndonkam kum ka jaka buh ia u ganja.
Ka kynhun ANTF mar ia ioh jingtip ia kane, kala hiar pynsted ban tohkit bad kala ioh ban kurup ia u ganja uba khia haduh 1001.655 kilo.
Ia kane ka longkmie la ialam tian bishar sha Iingkashari bad ka jingtohit mynta ka dang iaid shakhmat ban iohkem ia kiwei pat ki briew ba donkti lang ha kane ka kam khaii ganja.
