Shillong, Jylliew 14: Ki Nongtrei ka Mawmluh Cherra Cement Limited (MCCL), kila dawa ia ka Sorkar Jylla ban siew thikna ia ka tulop jong ki Nongtrei haba pyntip ba ka Sorkar kan hap ban buria haduh T. 200 klur ban siew khuid lut ia baroh ki jingsiew kynthup ka tulop ba pynsah jongki Nongtrei.
Kine ki Nongtrei kiba don hapoh ka lama MCCL Employees Union (MCCLEU), kila pynlong da ka jingia shong kyllaiñ myngor hynne ka sngi hakhmat ka Ophis MCCL ha Shillong ban pynbor ia ka Sorkar ba kan siew thikna noh ia ka tulop jong ki nongtrei.
“Kane ka jingdawa ka dei ka rai kaba mih na ka jingialang General Meeting ba long ha ka 9 tarik Jymmang . Ka jingdawa hi ka long ba ka Sorkar Jylla kan siew kumba dei ban siew ia ka tulop sha ki Nongtrei tad haduh ba ka karkhana kan treikam biang nalor ban pyllait noh ruh ia baroh ki jingsiew ba pynsahteng” ong u Bah Shanlang Lyngdoh, President ka MCCLEU haba iakren bad ki nongthoh khubor.
U Bah Shanlang u pyntip ba ka Union hi kam don satia ia ki jingkheiñ jingdiah kiba thikna hynrei imat ka Sorkar Jylla kan hap ban buria haduh T. 200 klur ban siew ia ka tulop bad ki jingsiew ba dang sah jong baroh ki Nongtrei ka MCCL.
Haba kylli ia ka jingdon ki nongtrei kiba kwah ban shim noh ia ka Voluntary Retirement Scheme (VRS), u President ula iathuh ba naduh u snem 2017, kila don haduh 150 ngut ki nongtrei kiba la pan ia ka VRS haba ong ba ka Sorkar Jylla ka dei ban pyntreikam noh ia ka VRS ne Golden Handshake Scheme sha ki Nongtrei kiba kwah ban iehnoh ia ka kam.
U Bah Shanlang la ong ba nalor ka jingdawa ia ka jingsiew beit ia ka tulop, ka MCCLEU kala shim ruh ia ka rai ban dawa na ka Sorkar Jylla ba kan pynsted noh ia ki kam ki jam ha kaban lah pynlong ia ka karkhana kaba treikam.
Ha kajuh ka por, ka MDC jong ka Nongskhen Kong Grace Mary Kharpuri kaba la leit kyrshan ia ka jingiakhih kine ki Nongtrei, kala ong ba kum ka nongmihkhmat jong ka thaiñ, ka don ia ka jingsngew khia halor ka bha ka miat jong ki Nongtrei ka MCCL.
“Nga hap ban wan kyrshan ia ki nongtrei ka MCCL ba iakhih bad nga wanrah ruh ia ka khubor na ka Sorkar Jylla ba ka Sorkar ka dang pynbiang ia ki jingdonkam baroh ban pyllait noh ia ka tulop jong ki Nongtrei bad ba ka kloi ruh ban iakren bad ki MCCLEU halor ka jingdawa ka jong k” ong i Kong Grace.
