Shillong, Lber 5: U Droks uba shongdor kumba T.300 Klur la ioh kurup da ki Pulit Meghalaya ha kine ki 2 snem kiba la dep, la ong u Director General of Police (DGP) u Dr LR Bishnoi haba pynpaw ba ka jingeh ban iakhun ia u droks ka dang long kaba jur khamtam ba ka jylla ka iajan bha bad ka Golden Triangle.
“Kumba T.300 Klur u Droks la dep ban ioh kurup ha kine ki 2 snem kiba la dep, ha kaba T.75 Klur u droks la ioh kurup ha u 2022 bad T.170 Klur ha u 2023 bad T.21 Klur hakine ki 2 bnai jong u snem 2024,” ong u Bishnoi haba iakren bad ki nongthoh khubor.
Ula pyntip ba ki pulit kila ioh kurup 7.5 Kg u Heroin ha u snem 2022, 16.3 Kg u Heroin ha u 2023 bad mynta la jan 1Kg u Heroin ha u 2024 ha kine ki ar bnai kiba la dep bad ka jingioh kurup ia u Heroin baroh lang ka long 26Kg.
Ha kaba iadei bad ka jingioh kurup ia u Ganja, u DGP ula ong, ha u snem 2022 la ioh kurup 3987 Kg, ha u 2023 la ioh kurup kumba 1400 Kg hynrei ha u 2024 ka jingioh kurup kala nang bun kaba la poi sha ka 4750 Kg.
U DGP ula pynkup burom ruh ia ki pulit jongka Ri Bhoi halor ka jingioh kurup ka jongki ia u Ganja uba dei uba bha tam ha ka sngi u Blei.
“Ka jingkhynra ki pulit ka Ri Bhoi bad ka jingioh kurup 4,750 Kg u Ganja uba bha tam bad ka jaka kaba la wanrah ia une u Ganja kadei na Tripura bad la wan iaid lyngba ka Meghalaya bad ngi la ioh ban kem ia kiba donkti bad mynta ki dang pynlong ia ka jingtohkit” ula ong.
Ula iathuh, ba ka jingioh kurup ia u Yabba Tablet ha u 2022 ka long kumba 19,000 tylli, ha u 2023 palat ia ka 60,000 tablet bad ha ki ar bnai jong u 2024 kumba 2000 tablet, katba kiwei pat ki jingdih pynbuaid kiba sniew la ioh kurup kumba 16,928 tylli ha u 2022, ha u 2023 la ioh kurup 32,298 tylli bad 600 ha u 2024.
U DGP ula ong, ruh ba kadei ha ka sien kaba nyngkong eh ha ka histori jong ki pulit ka Meghalaya ba kila ioh kurup ia u Drok Crystal Meth uba don 14.2 Kg.
“U Crystal Meth udei u drok uba remdor bha. Ka dor jongu ha iew ka kot sha ka T.1.5 Klur shi Kg” ong u DGP.
U DGP ula ong ha u snem 2022, ki pulit kila dep rejistar 116 tylli ki case, ha u snem 2023 ka jingrejistar ia ki case kala kiew sha ka 189 bad mynta ha kine ki 2 bnai jong u 2024 la rejistar 13 tylli ki case.
Kila don 610 ngut kiba la shah kem naduh u 2022- 2024 ha kaba 234 ngut kila shah kem ha u 2022, 355 ngut kila shah kem ha u 2023 bad 25 ngut ha u 2024 bad 10% na kitei kiba shah kem kidei kiba khaïï ia ki Kynthei.
Nalor kane 19 ngut kidei kiba ju mlien ban leh ia kitei ki kam sniew, ha kaba 8 tylli ki case hapoh jongka PITNDPS la dep ban aiti sha ka ingkashari bad mynta ka Advisory Board kan sa shim ia ka rai, la iathuh u Bishnoi.
“Ka jylla ka don hapdeng ka jingma namar ba ka iajan bha bad ki thaiñ kiba hap hapoh jongka “Golden Triangle”. Mynshwa kadei tang ka jaka kaba shu iaid lyngba hynrei mynta kala dei ka jaka kaba don ia ka jingthmu bad ka jaka kaba iaid lyngba” ong u DGP
Ula ong ba kala don ka jingkiew ki nongdih droks ha ka jylla bad kane kala buh haka jingsngewkhia ia baroh.
“Ban iakhun ia kane ka jingeh, ki pulit Meghalaya kila shim ia ki sienjam da kaba pynsngewthuh ia ki samla da kaba pynlong ia ki Awareness Programme ha ki skul, college bad university bad kila bteng ban pynlong ia ka jingkhynra pyrshah ia ki nongdie droks” ong u Bishnoi bad ka iathuh ba kiba bun hi na ki nongdie drok kidei kiba ju lapmiet ha kaban die droks bad kila don ruh ki kynhun jong ki runar na ka jylla bad kiba na kiwei ki jylla bad ki pulit ki iengskhem ha kaban tehlakam ia kane ka kam sniew.
Nalor kane u DGP ula ong “Ngi la pyndonkam ia ki kor ki bor ban kem ia ki nongkhaii droks bad ka CID kala leh ia ka kamram ha kaban pyndonkam ia ki kor teknoloji ban lapksai ia ka jingiadei jong kine ki nongkhaïï. Ngi la ia sam lang ia ki jingtip bad kiwei pat ki jylla khnang ba kan don ka jingiatreilang bad ba ngin lah ban tehlakam ia kane ka jingeh.
Ula iathuh ba ki pulit kila iadonbynta ruh ha kaba iadei bad ka Rehabilitation bad la buh ia ki counselling cell ha kiba bun ki Police Station khnang ba ki n iasyllok bad kiba ngop ha u droks da kaba khot lang ia ki dkhot jong ka iing ka sem.
Ula ong, ba u Mynti Rangbah u don ia ka jingiohi jngai ban pynlong ia ka Meghalaya kaba lait na u Droks bad kumta kin trei shitom da kaba pyndonkam ia ka Social Media Tweets.
U DGP, ula ong ba ki pulit Meghalaya kila pynkheiñ ruh ia ka rekod ha ka jingioh kurup ia ka pisa, ha u snem 2022 kila ioh kurup T.36 lak, ha u 2023 la ioh kurup T.45.6 lak bad ha u 2024 la ioh kurup T.60,000. Katba ia ki kali, kila ioh kurup 67 tylli ha u 2022, 157 tylli ha u 2023 bad ha kine ki 2 bnai jong u 2024 la ioh kurup 12 tylli.
Ha kaba iadei bad ka dawai jyrhoh ula ong, ba ha u snem 2022 la ioh kurup 28,000 bilor, ha u 2023 la ioh kurup 88,000 bilor bad ha kine ki 2 bnai jong u 2024 la ioh kurup 112 bilor. Ki pulit kila ioh kurup 137 tylli ki Mobile Phone ha u 2022, 408 tylli ha u 2023 bad 30 tylli haduh mynta u snem 2024.
