Shillong, Rymphang 19 : U Myntri ka Tnad pule puthi Rakkam A Sangma ha ka sngi Nyngkong, ula ai ka jingkular hapoh ka Iingdorbar ba un sa khmih ia ka jingujor ba pyntip ia ka jingbym ioh khaw Mid Day Meal jong ki khyndai tylli ki skul ka Jylla.
U Myntri ula ai ia kane ka jingkular halor ka jingkylli bynrap jong u MLA Rupa M Marak ba pyntip ba ula ioh pdiang ia ki jingujor na ki khyndai tylli ki skul ba kim shym ioh bhah satia ia u khaw Mid Day Meal. Ula kyrpad ia u Myntri ban leh eiei halor kane ka kam.
U Myntri haba jubab ula pyntip ba kam shym la don ne wan satia kano kano ka jingujor sha u ba iadei bad kine ki khyndai tylli ki skul bym ioh ia ka bhah sam khaw Mid Day Meal.
“Kane kam dei satia ban jia hynrei ngim shym la ioh ia kano kano ka jingujor. Watla katta, ngin sa khmih bad shimkhia ia ka kam” ong u Rakkam.
Ha kajuh ka por, u Rupa ula pan jingtip halor ka sienjam bala shim pyrshah ia ka jingbym pyntreikam hok ia ka Mid Day Meal Scheme ban pynthikna ba ki khynnah skul ki dei ban ioh ia ki jingbam kiba bha.
Halor kane, u Myntri ula ong, ki jingbam kiba bha tam la ai sha ki khynnah. Ki Deputy Commissioner (Supply), FCI bad ki Wholesaler kila bud thik pa thik ia ki kyndon sam khaw Mid Day Meal sha ki skul.
