Shillong, Nailar 13: U Myntri Khynnah ka Sorkar Pdeng Bishweswar Tudu ula kular ban shimkhia ha kaba iakren bad ka Sorkar Pdeng halor ka jingdawa ban pyntreikam ia ka Inner Line Permit (ILP) bad ban pynrung ia ka ktien Khasi bad Garo ha ka khyrnit ba phra jong ka Riti Synshar ka Ri.
“Kiba bun ki Myntri ka Sorkar Pdeng kila wan sha ka thain Shatei Lam Mihngi bad kila ai ia ka kaiphod sha ka Sorkar pdeng na ka por sha ka por. Ngan sa ai ia ka report bad ngan sa iakren halor kine ki ishu bad ngin sa peit ia kaei kaba ngi dei ban leh” ong u Tudu haba iakren bad ki Nongthoh Khubor haba kylli ia ka jingbym sngew shngain jong ki paid riewlum ka Jylla namar ka jingbym don ia ki ain ban pyrrkhing ia ka jingwan rung ki mynder.
Halor ka jingpynslem ka Sorkar Pdeng ban ai ia ka rai halor ka Resolution bala mynjur da ka Iingdorbar Thawain ban pyntreikam ia ka ILP ha Jylla, u Tudu ula ong “Ha ka jingwan biang jong nga sha Jylla, ngan sa ai ka jubab bad ngan sa kren ruh ia ki Nongialam bad ngan sa ai jingmut ia ki halor kane ka kam”.
U MoS ula kular ban sa shimkhia halor ka jingdawa ban pynrung ia ka Ktien Khasi bad Garo ha ka khyrnit ba phra jong ka Riti Synshar ka Ri India.
Haba iadei bad ka jingdawa ban pynbna ia ka niam Khasi bad NiamTre kum ka Niam Tynrai jong kiba rit paid, u Tudu ula pynpaw ba haduh mynta ym pat ioh pdiang ia kano kano ka jingthoh halor kane ka kam.’
“Lada nga ioh pdiang da ka jingthoh ngan sa lah ban ong eiei, bad ngan sap hah ia ka kun hun ban tohkit bad bishar ia kane ka kam khnang ban lah pynbeit ryntih ia ka” ula ong.
